ജനവിധി എതിരാക്കിയത് ഇടതുപക്ഷ ബദൽ സാധ്യമല്ലെന്ന ചിന്ത: കോടിയേരി

കൊണ്ടോട്ടി ∙ ദേശീയതലത്തിൽ ബിജെപിക്ക് ബദലുണ്ടാക്കാൻ ഇടതുപക്ഷത്തിനു കഴിയില്ലെന്ന ജനങ്ങളുടെ കണക്കുകൂട്ടലാണ് ലോക്സഭാ തിരഞ്ഞെടുപ്പു ഫലം പ്രതികൂലമാക്കിയതെന്ന് സിപിഎം സംസ്‌ഥാന സെക്രട്ടറി കോടിയേരി ബാലകൃഷ്‌ണൻ. ജനം നൽകിയ താക്കീത് ഉൾക്കൊണ്ടു മുന്നോട്ടുപോവുകയാണ് ഇടതുപക്ഷം ചെയ്യേണ്ടത്. വോട്ട് ചെയ്യാത്ത ആരോടും വിദ്വേഷമോ അകൽച്ചയോ ഇല്ലെന്നും തിരഞ്ഞെടുപ്പുഫലം എന്തെന്നു നോക്കാതെ ജനങ്ങൾക്കൊപ്പം നിന്നു പ്രവർത്തിക്കുന്നതാണ് ഇടതുപക്ഷത്തിന്റെ ശൈലിയെന്നും അദ്ദേഹം പറഞ്ഞു. ‘ഇഎംഎസിന്റെ ലോകം’ ദേശീയ സെമിനാറിന്റെ ഭാഗമായുള്ള അനുസ്‌മരണ സമ്മേളനം ഉദ്‌ഘാടനം ചെയ്യുകയായിരുന്നു കോടിയേരി. എല്ലാ മതവിഭാഗത്തിലും ഉൾപ്പെട്ടവർ യുഡിഎഫിന് വോട്ട് ചെയ്തിട്ടുണ്ട്.