ജേക്കബ് തോമസിന്റെ സസ്പെൻഷൻ നീട്ടി

തിരുവനന്തപുരം ∙ ഡിജിപി: ജേക്കബ് തോമസിന്റെ സസ്പെൻഷൻ സർക്കാർ 6 മാസത്തേക്കുകൂടി നീട്ടി. സസ്പെൻഷൻ റിവ്യു കമ്മിറ്റിയുടെ ശുപാർശ പ്രകാരം 18 മുതൽ 6 മാസത്തേക്കാണു നീട്ടിയത്. ജേക്കബ് തോമസിനെതിരായ വിജിലൻസ് അന്വേഷണം തുടരുന്നതിനാൽ സസ്പെൻഷൻ നീട്ടണമെന്നു വിജിലൻസ് ഡയറക്ടർ ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണു നടപടി.

തുറമുഖ വകുപ്പു ഡയറക്ടറായിരിക്കെ ഡ്രജർ വാങ്ങുന്നതിൽ അഴിമതി നടത്തിയെന്ന് ആരോപിച്ചാണു വിജിലൻസ് കേസ്. ആത്മകഥയായ ‘സ്രാവുകൾക്കൊപ്പം നീന്തുമ്പോൾ’ എന്ന പുസ്തകത്തിൽ ഔദ്യോഗിക രഹസ്യ നിയമം ലംഘിച്ചതിനു ജേക്കബ് തോമസിനെതിരെ ക്രൈംബ്രാഞ്ചും കേസെടുത്തിട്ടുണ്ട്.

ഒന്നര വർഷമായി ജേക്കബ് തോമസ് സസ്പെൻഷനിലാണ്. അഴിമതിവിരുദ്ധ പൊതുയോഗത്തിൽ ഓഖി ബാധിതർക്കുള്ള നടപടിയിലെ വീഴ്ച സംബന്ധിച്ചു നടത്തിയ പരാമർശത്തിന്റെയും മറ്റും പേരിലായിരുന്നു 2017 ഡിസംബറിൽ സസ്പെൻഡ് ചെയ്തത്.