പുത്തുമല: ഒരു മൃതദേഹം കൂടി കണ്ടെത്തി

കൽപറ്റ/കവളപ്പാറ ∙ പുത്തുമല ദുരന്തത്തിൽ അകപ്പെട്ട ഒരാളുടെ മൃതദേഹം കൂടി ഇന്നലെ കണ്ടെത്തി. ദുരന്തം നടന്നതിന് 6 കിലോമീറ്റർ മാറി സൂചിപ്പാറയ്ക്കു സമീപം ഏലവയലിലാണ് സ്ത്രീയുടെ മൃതദേഹം കണ്ടെത്തിയത്. 12 മൃതദേഹങ്ങളാണ് ഇതുവരെ കണ്ടെത്തിയത്. 

കവളപ്പാറയിൽ ഇന്നലെത്തെ തിരച്ചിലിൽ ആരെയും കണ്ടെത്താനായില്ല. 46 പേരുടെ മൃതദേഹങ്ങളാണ് ഇതുവരെ കണ്ടെത്തിയത്. 13 പേർ ഇപ്പോഴും മണ്ണിൽ കുടുങ്ങിക്കിടക്കുന്നുവെന്നാണു സൂചന. പുത്തുമലയിൽ ഞായറാഴ്ച കണ്ടെത്തിയ പുരുഷന്റെ മൃതദേഹം ആരുടെതാണെന്നു തിരിച്ചറിയുന്നതിനുള്ള ഡിഎൻഎ പരിശോധനയുടെ ഫലം 2 ദിവസത്തിനുള്ളിൽ ലഭിക്കും. ഇന്നലെ കണ്ടെത്തിയ മൃതദേഹവും തിരിച്ചറിഞ്ഞിട്ടില്ല. ഇനി 5 പേരെയാണ് കണ്ടെത്താനുള്ളത്. സംസ്ഥാനത്താകെ 126 മരണമാണു റിപ്പോർട്ട് ചെയ്തിരിക്കുന്നത്.