ചുട്ടുപൊള്ളി നാല് ജില്ലകൾ; ജാഗ്രത പുലർത്തണമെന്നു മുന്നറിയിപ്പ്
Mail This Article
തിരുവനന്തപുരം ∙ ആലപ്പുഴ, കോട്ടയം, കണ്ണൂർ, കാസർകോട് ജില്ലകളിൽ ഇന്നു കടുത്ത ചൂട് അനുഭവപ്പെടുമെന്ന് മുന്നറിയിപ്പ്. സാധാരണ താപനിലയെക്കാൾ 2 മുതൽ 4 ഡിഗ്രി വരെ ചൂടു കൂടും. ജാഗ്രത പുലർത്തണമെന്നു സംസ്ഥാന ദുരന്തനിവാരണ അതോറിറ്റി മുന്നറിയിപ്പു നൽകി.
കാലാവസ്ഥാ കേന്ദ്രത്തിന്റെ രേഖകൾ പ്രകാരം ഇന്നലെ ആലപ്പുഴ, കോട്ടയം, കോഴിക്കോട്, കണ്ണൂർ എന്നിവിടങ്ങളിൽ ചൂട് 37 ഡിഗ്രി കടന്നു. ഏതാനും ദിവസം കൂടി ചൂടു തുടരുമെന്നാണു പ്രവചനം. വേനൽ മഴയ്ക്കുള്ള സാധ്യത അടുത്തൊന്നുമില്ല.
തണുത്തുറഞ്ഞ് മൂന്നാർ
മൂന്നാറിൽ കുറഞ്ഞ താപനില വീണ്ടും പൂജ്യത്തിൽ. കണ്ണൻദേവൻ കമ്പനിയുടെ ചെണ്ടുവര ലോവർ ഡിവിഷനിലാണ് ഇന്നലെ രാവിലെ താപനില പൂജ്യമായത്. ചെറുതായി മഞ്ഞുവീഴ്ചയുമുണ്ടായി. മൂന്നാർ ടൗണിൽ 5 ഡിഗ്രിയാണ് കുറഞ്ഞ താപനില. മുൻ വർഷങ്ങളെ അപേക്ഷിച്ച് ഫെബ്രുവരിയിൽ മൂന്നാറിൽ താപനില പൂജ്യത്തിലെത്തുന്നത് ആദ്യമാണ്.
English Summary: High Temperature at four Districts