തൊഴിലുറപ്പു വേതനം കേരളത്തിൽ 20 രൂപ കൂട്ടി

പത്തനംതിട്ട ∙ തൊഴിലുറപ്പു വേതനം കേരളത്തിൽ 20 രൂപ കൂട്ടി കേന്ദ്ര ഉത്തരവായി. അടുത്തമാസം മുതൽ ദിവസക്കൂലി 291 രൂപ. 15.65 ലക്ഷം തൊഴിലാളികൾക്കു വർധന ആശ്വാസമാകും. ഇതിൽ 80% സ്ത്രീകളാണ്. ഏറ്റവും കൂടുതൽ സ്ത്രീ തൊഴിലാളി പ്രാധിനിധ്യമുള്ള സംസ്ഥാനമാണു കേരളം.

ഇൗ സാമ്പത്തിക വർഷം 7 കോടി തൊഴിൽദിനങ്ങളാണു കേരളത്തിന് അനുവദിച്ചിരുന്നതെങ്കിലും 7.82 കോടി തൊഴിൽദിനങ്ങൾ സൃഷ്ടിച്ചു. അധിക ദിനങ്ങളുടെ കൂലി കൂടി കേന്ദ്രത്തിൽ നിന്നു ലഭിക്കും. അടുത്ത സാമ്പത്തിക വർഷം 8 കോടി തൊഴിൽദിനങ്ങളാണ് അനുവദിച്ചിരിക്കുന്നത്. തൊഴിലുറപ്പു വേതനത്തിൽ രാജ്യത്തു മൂന്നാമതാണു കേരളം; ഇതിൽ കൂടുതലുള്ളതു ഹരിയാനയിലും (309 രൂപ) സിക്കിമിലും (308 രൂപ). 

English summary: NREGA wage hike