കോവിഡിനെ തോൽപിച്ച് എസ്എസ്എൽസി 98.82 % ജയം

തിരുവനന്തപുരം ∙ കോവിഡ് പ്രതിസന്ധിയെ അതിജീവിച്ചു പൂർത്തിയാക്കിയ എസ്‌എസ്‌എൽസി പരീക്ഷയിൽ 98.82% ജയം. കഴിഞ്ഞ വർഷം 98.11% ആയിരുന്നു. പരീക്ഷയെഴുതിയ 4,22,092 വിദ്യാർഥികളിൽ 4,17,101 പേർ ജയിച്ചു. ഇവരിൽ 10 ശതമാനത്തിലേറെപ്പേർക്ക് (41,906) എല്ലാ വിഷയങ്ങൾക്കും എ പ്ലസ് ലഭിച്ചു; കഴിഞ്ഞ വർഷം ലഭിച്ചവർ 37,334.

പ്രൈവറ്റായി എഴുതിയ 1770 വിദ്യാർഥികളിൽ (പുതിയ സ്കീം) 1356 പേർ ജയിച്ചു– 76.61%. എസ്എസ്എൽസി–ഹിയറിങ് ഇംപയേഡിൽ 100,  ടിഎച്ച്എസ്എൽസിയിൽ 99.13, എഎച്ച്എസ്എൽസിയിൽ 77.14 എന്നിങ്ങനെയാണു വിജയശതമാനം. സിബിഎസ്ഇ, ഐസിഎസ്ഇ ഫലങ്ങൾ കൂടി പ്രസിദ്ധീകരിച്ച ശേഷം പ്ലസ് വൺ പ്രവേശന നടപടികൾ തുടങ്ങുമെന്നു മന്ത്രി സി. രവീന്ദ്രനാഥ് അറിയിച്ചു. 

പ്രോഗ്രസ് കാർഡ്

∙വിജയശതമാനത്തിൽ മുന്നിലുള്ള ജില്ല: പത്തനംതിട്ട– 99.71%

∙വിജയശതമാനം കൂടുതലുള്ള വിദ്യാഭ്യാസ ജില്ല: കുട്ടനാട്– 100%

∙ഏറ്റവും കൂടുതൽ എ പ്ലസ് ഉള്ള ജില്ല: മലപ്പുറം– 6447

∙100 % ജയമുള്ള സ്കൂളുകൾ: 1837 (കഴിഞ്ഞ വർഷം 1703).

∙സർക്കാർ– 637, എയ്ഡഡ്– 796, അൺ എയ്ഡഡ്– 404 

English summary: SSLC exam result 2020