തന്നെ അറസ്റ്റ് ചെയ്യാൻ ഗൂഢനീക്കം നടന്നെന്ന് കുമ്മനം രാജശേഖരൻ: ‘രാഷ്ട്രീയ ഗൂഢാലോചന’

പന്തളം ∙ മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം.ശിവശങ്കർ അറസ്റ്റിലായ ദിവസം തന്നെയും അറസ്റ്റ് ചെയ്യാൻ സിപിഎമ്മും പൊലീസും പദ്ധതിയിട്ടിരുന്നെന്ന് മുതിർന്ന ബിജെപി നേതാവ് കുമ്മനം രാജശേഖരൻ. ഇതിനായി നടത്തിയ രാഷ്ട്രീയ ഗൂഢാലോചനയാണ് പണമിടപാട് സംബന്ധിച്ച് തന്നെ പ്രതിയാക്കിയ കേസ്‍. പരാതി ഒത്തുതീർപ്പാക്കാൻ ബന്ധപ്പെട്ടവർ തയാറായിരുന്നിട്ടും 12 ദിവസം വൈകിപ്പിച്ചു. കേസ് കെട്ടിച്ചമച്ചതാണെന്നും നിരപരാധിത്വം  തെളിയിക്കാൻ   നിയമ നടപടി സ്വീകരിക്കുമെന്നും അദ്ദേഹം പറഞ്ഞു.  

ശബരിമലയിലെ ആചാരങ്ങളിൽ സർക്കാർ ഏർപ്പെടുത്തുന്ന വിലക്കുകൾ, അടുത്ത വർഷം മുതൽ ആചാരങ്ങൾ പൂർണമായി ഒഴിവാക്കാനുള്ള ശ്രമത്തിന്റെ തുടക്കമാണ്. ദേവസ്വം ബോർഡിനെ ഇരുട്ടിൽ നിർത്തിയാണ് സർക്കാർ പ്രവർത്തിക്കുന്നത്. തന്ത്രിയും പന്തളം കൊട്ടാരവും ദേവസ്വം ബോർഡും ഭക്തജന സംഘടനകളുമാണ് ആചാരങ്ങളിൽ തീരുമാനമെടുക്കേണ്ടത്. എന്നാൽ, നടപടികളെല്ലാം ഏകപക്ഷീയമാണ്. ശബരിമലയെ വിനോദസഞ്ചാര കേന്ദ്രമായി മാറ്റാനാണ് ശ്രമമെന്നും അദ്ദേഹം പറഞ്ഞു.