പെട്രോളിന് 21 പൈസയും ഡീസലിന് 30 പൈസയും കൂടി

കൊച്ചി ∙ രാജ്യത്ത് ഇന്ധനവിലയിൽ വീണ്ടും വർധന. ഇന്നലെ പെട്രോളിന് 21 പൈസയും ഡീസലിന് 30 പൈസയും കൂടി. ഇതോടെ കൊച്ചി നഗരത്തിൽ ഒരു ലീറ്റർ പെട്രോളിന്റെ വില 82.59 രൂപയായി. ഡീസലിന് ലീറ്ററിന് 76.48 രൂപ നൽകണം. 

തിരുവനന്തപുരത്തും കോഴിക്കോടും പെട്രോൾ വില ലീറ്ററിന് 83 രൂപയ്ക്കു മുകളിലാണ്. ഡീസലിന് 77 രൂപ നൽകണം. കഴിഞ്ഞ 10 ദിവസത്തിനുള്ളിൽ 9 തവണയാണ് എണ്ണക്കമ്പനികൾ വില കൂട്ടുന്നത്. 10 ദിവസംകൊണ്ട് പെട്രോളിന് ഒരു രൂപ 33 പൈസയും ഡീസലിന് രണ്ടു രൂപ 10 പൈസയും ഉയർന്നു. 

രാജ്യാന്തര വിപണിയിൽ അസംസ്കൃത എണ്ണവില ഉയരുന്നതാണ‌ു വില വർധനയ്ക്കു കാരണം. അസംസ്കൃത എണ്ണയ്ക്ക് ബാരലിന് 48 ഡോളറാണു വില. അതേസമയം, ബിഹാർ തിരഞ്ഞെടുപ്പിനെ തുടർന്നായിരുന്നു ഇന്ധന വില വർധന നിർത്തിവച്ചതെന്നും തിരഞ്ഞെടുപ്പ‌ു കഴിഞ്ഞതോടെ വില വർധിപ്പിക്കുകയാണെന്നും ആരോപണമുണ്ട്.