മൊബൈൽ റേഞ്ച് കിട്ടാൻ മരത്തിൽ കയറിയ കുട്ടിക്ക് വീണു പരുക്ക്

കൂത്തുപറമ്പ് (കണ്ണൂർ) ∙ നെറ്റ്‌വർക് ലഭിക്കാത്തതിനാൽ മൊബൈൽ ഫോണുമായി ഉയരമുള്ള മരത്തിൽ കയറിയ വിദ്യാർഥിക്കു കൊമ്പ് ഒടിഞ്ഞു വീണു ഗുരുതരമായി പരുക്കേറ്റു.

ചിറ്റാരിപ്പറമ്പ് പഞ്ചായത്തിൽ കണ്ണവം വനമേഖലയോടു ചേർന്നുള്ള പന്ന്യോട് ആദിവാസി കോളനിയിലെ സിന്ധു നിവാസിൽ പി.ബാബു - ഉഷ ദമ്പതികളുടെ മകൻ അനന്തു ബാബു(17) പരിയാരം മെഡിക്കൽ കോളജ് ആശുപത്രിയിൽ ചികിത്സയിലാണ്. നട്ടെല്ലിനു പൊട്ടലുണ്ട്. പ്ലസ് വൺ അലോട്ട്മെന്റ് വിവരങ്ങൾ ഇന്റർനെറ്റിൽ തിരയുന്നതിനാണ് അനന്തു മരത്തിൽ കയറിയത്. ഇന്നലെ ഉച്ചയോടെയാണ് അപകടം. 

ഈ പ്രദേശത്തു മൊബൈൽ കവറേജ് ലഭിക്കുന്നില്ലെന്ന് പലവട്ടം പരാതിപ്പെട്ടിരുന്നു. മരങ്ങളുടെ മുകളിലോ ഏറുമാടത്തിലോ ഇരുന്നാണു കുട്ടികൾ ഓൺലൈൻ ക്ലാസിൽ പങ്കെടുക്കുന്നത്. വന്യമൃഗങ്ങളെ പേടിച്ച് മാതാപിതാക്കൾ കൂട്ടിരിക്കേണ്ട സ്ഥിതിയുമുണ്ട്.

English Summary: Student injured falling from tree