കോവിഡ് മരണം 50,000; ഇന്നലെ കോവിഡ് 9066, ടിപിആർ 14.18%
Mail This Article
തിരുവനന്തപുരം ∙ സംസ്ഥാനത്ത് കോവിഡ് മരണം അര ലക്ഷം കടന്നു; ആകെ 50,053. ഇതിൽ 19,316 എണ്ണവും ബന്ധുക്കൾ നൽകിയ അപ്പീലിലൂടെ സർക്കാർ അംഗീകരിച്ചതാണ്. 75 ദിവസത്തെ ഇടവേളയ്ക്കുശേഷം പ്രതിദിന കോവിഡ് കേസുകൾ വീണ്ടും 9000 കടക്കുകയും ചെയ്തു. ഇന്നലെ 63,898 സാംപിളുകൾ പരിശോധിച്ചപ്പോൾ 9066 പേർ പോസിറ്റീവായി. ടിപിആർ 14.18%. തിരുവനന്തപുരം (2200), എറണാകുളം (1478), തൃശൂർ (943) ജില്ലകളിലാണ് കൂടുതൽ കേസുകൾ റിപ്പോർട്ട് ചെയ്തത്.
ഒരാഴ്ചയ്ക്കിടെ കോവിഡ് കേസുകളിൽ 100% വർധനയാണ് ഉണ്ടായിരിക്കുന്നതെന്നു മന്ത്രി വീണാ ജോർജ് അറിയിച്ചു. ആരോഗ്യ പ്രവർത്തകർക്കും 20–40 പ്രായപരിധിയിലുള്ളവർക്കും കോവിഡ് കൂടുതലായി ബാധിക്കുന്നു. മുൻപ് ഒക്ടോബർ 27നാണ് കേസുകൾ 9000 കടന്നത്. അന്ന് 82,869 സാംപിളുകളിലായി 9445 കേസുകളാണു കണ്ടെത്തിയത്; ടിപിആർ 11.42%. ഡിസംബർ 27നു ടിപിആർ 3.88% (1636 കേസുകൾ) വരെ കുറഞ്ഞിരുന്നു. കോവിഡ് മരണം അര ലക്ഷം കടക്കുന്ന രണ്ടാമത്തെ സംസ്ഥാനമാണു കേരളം. മഹാരാഷ്ട്രയിൽ മരണം 1.41 ലക്ഷമായി. രാജ്യത്താകെ മരണം 4.84 ലക്ഷം.
Content Highlight: Covid death