‘വാത്സല്യ ദൗത്യം’: കേരളത്തിന് 60% കേന്ദ്രസഹായം

ന്യൂഡൽഹി ∙ ‘വാത്സല്യ ദൗത്യം’ എന്നു പേരു മാറിയ കേന്ദ്ര സർക്കാരിന്റെ ശിശു സംരക്ഷണ പദ്ധതികളുമായി ബന്ധപ്പെട്ട വിശദമായ മാർഗരേഖ വനിത ശിശുക്ഷേമ മന്ത്രാലയം പുറത്തിറക്കി. ഇതുപ്രകാരം പദ്ധതികളുടെ 60% കേന്ദ്ര സർക്കാരും 40% കേരളവും വഹിക്കണം. അരുണാചൽ, അസം, ഹിമാചൽ തുടങ്ങിയ സംസ്ഥാനങ്ങൾക്ക് പദ്ധതി ചെലവിന്റെ 90% കേന്ദ്രത്തിൽ നിന്നു ലഭിക്കും. കേന്ദ്രഭരണ പ്രദേശങ്ങൾക്ക് പൂർണ ചെലവു കേന്ദ്രം നൽകും.

പരിചരണം ആവശ്യമായ കുട്ടികളുടെ പ്രായവും സാഹചര്യവും മനസ്സിലാക്കി 4 തരത്തിൽ സഹായം നൽകുമെന്നും മാർഗരേഖയിലുണ്ട്. സ്പോൺസർഷിപ്, പോറ്റമ്മ, ദത്തെടുക്കൽ, തുടർപരിചരണം എന്നിങ്ങനെ 4 വിഭാഗത്തിലാണ് സഹായം നൽകുക. 4000 രൂപ വീതം കേന്ദ്ര സർക്കാർ നൽകും. കൂടുതൽ ആവശ്യമെങ്കിൽ സംസ്ഥാന സർക്കാർ നൽകണം.

English Summary: Vatsalya Mission fund allocation to Kerala