സ്വപ്നം വരയ്ക്കാൻ കൈകളെന്തിന്?

മനോരമയുടെ ഇന്നത്തെ തലക്കെട്ടുദൃശ്യം തയാറാക്കിയ സ്വപ്ന അഗസ്റ്റിന്റെ വാക്കുകൾ: 

പ്രകൃതിയിലെ സുന്ദരദൃശ്യങ്ങൾ വരയ്ക്കാനാണ് എനിക്കേറെയിഷ്ടം. പക്ഷേ, മനോരമയുടെ തലക്കെട്ടുദൃശ്യത്തിനു വേണ്ടി ഇന്ത്യയെ വരയ്ക്കാൻ തീരുമാനിച്ചപ്പോൾ  മനസ്സിൽ കയറിവന്നത് നമ്മുടെ ദേശീയ പക്ഷിയായ മയിലും ദേശീയ പുഷ്പമായ താമരയുമാണ്. കാലുകൾകൊണ്ടും വായകൊണ്ടും ചിത്രം വരയ്ക്കുന്നവരുടെ സംഘടനയിൽ (മൗത്ത് ആൻഡ് ഫൂട്ട് പെയിന്റിങ് ആർട്ടിസ്റ്റ്സ് – എംഎഫ്പിഎ) അംഗമാണ് ഞാൻ. 

കടലാസ് നിലത്തുവിരിച്ചു കാൽ വിരലുകൾക്കിടയിൽ ബ്രഷ് പിടിച്ചാണു ഞാൻ ചിത്രങ്ങൾ വരയ്ക്കുന്നത്. എന്നെപ്പോലെ വേറെയും ഒരുപാടു പേരുണ്ട്; മലയാളികളുമുണ്ട്. കൈകൾ ഇല്ലെന്നത് ബ്രഷ് എടുക്കാൻ അവർക്കു തടസ്സമായില്ല. അല്ലെങ്കിലും, സ്വപ്നം വരയ്ക്കാൻ കൈകൾ  എന്തിനാണ്?

English Summary: Malayala Manorama Independence Day Masthead