പ്രിയ വർഗീസിന്റെ ഡപ്യൂട്ടേഷൻ നീട്ടി

തിരുവനന്തപുരം∙ മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ.രാഗേഷിന്റെ ഭാര്യ ഡോ.പ്രിയ വർഗീസിനു ഭാഷാ ഇൻസ്റ്റിറ്റ്യൂട്ടിലെ അസി.ഡയറക്ടർ എന്ന നിലയിൽ ഒരു വർഷം കൂടി ഡപ്യൂട്ടേഷൻ നീട്ടി നൽകി സർക്കാർ ഉത്തരവിറക്കി. കണ്ണൂർ സർവകലാശാലയിലെ അസോഷ്യേറ്റ് പ്രഫസർ നിയമനത്തിനുള്ള റാങ്ക് പട്ടികയിൽ പ്രിയയ്ക്ക് ഒന്നാം സ്ഥാനം നൽകിയതു വിവാദമായിരുന്നു. റാങ്ക് പട്ടിക സിൻഡിക്കറ്റ് അംഗീകരിച്ചെങ്കിലും ഇതുവരെ നിയമനം നടത്തിയിട്ടില്ല.

തൃശൂർ കേരളവർമ കോളജിൽ മലയാള വിഭാഗം അസി.പ്രഫസറായ പ്രിയയ്ക്കു കഴിഞ്ഞ ജൂലൈ 7 മുതൽ പ്രാബല്യത്തോടെയാണു ഡപ്യൂട്ടേഷൻ നീട്ടിയത്. കണ്ണൂർ സർവകലാശാലയിൽ നിന്ന് ഇതുവരെ നിയമന ഉത്തരവു ലഭിച്ചിട്ടില്ലെന്നും നിയമനം സംബന്ധിച്ച വിവാദം അടിസ്ഥാനരഹിതമാണെന്നും പ്രിയ വർഗീസ് പ്രതികരിച്ചു.

English Summary: Priya Varghese's Deputation Period Extended