ശശി തരൂരിന് ഫ്രഞ്ച് സർക്കാരിന്റെ ഷെവലിയർ ബഹുമതി

തിരുവനന്തപുരം∙ ശശി തരൂർ എംപിക്ക് ഫ്രഞ്ച് സർക്കാരിന്റെ പരമോന്നത സിവിലിയൻ ബഹുമതിയായ ഷെവലിയർ പദവി. പ്രഭാഷകൻ, എഴുത്തുകാരൻ എന്നീ നിലകളിലുള്ള സംഭാവനകൾ കണക്കിലെടുത്താണിത്. പുരസ്കാര സമർപ്പണത്തീയതി തീരുമാനിച്ചിട്ടില്ല.

ഫ്രാൻസുമായുള്ള ഇന്ത്യയുടെ ബന്ധത്തെ വിലമതിക്കുകയും ആ ഭാഷയെയും സംസ്കാരത്തെയും ആരാധിക്കുകയും ചെയ്യുന്ന വ്യക്തിയെന്ന നിലയിൽ, ഈ രീതിയിൽ അംഗീകരിക്കപ്പെട്ടതിൽ അഭിമാനമുണ്ടെന്നും ഫ്രഞ്ച് സർക്കാരിനെ നന്ദി അറിയിക്കുന്നെന്നും തരൂർ ട്വിറ്ററിൽ കുറിച്ചു.

മറ്റൊരു രാജ്യത്തിന്റെ ഉന്നത സിവിലിയൻ ബഹുമതി തരൂരിന് ഇതു രണ്ടാം തവണയാണു ലഭിക്കുന്നത്. 2010ൽ സ്പാനിഷ് സർക്കാരിന്റെ ബഹുമതി സ്പെയിൻ രാജാവ് സമ്മാനിച്ചിരുന്നു.

English Summary: Shashi Tharoor to receive Legion Of Honour ‘Chevalier de la Legion d’Honneur’, France’s highest civilian award