ബഫർ സോൺ: സർക്കാർ ഉത്തരവിൽ അവ്യക്തതയെന്ന് സതീശൻ

തിരുവനന്തപുരം∙ബഫർ സോ‍ണുമായി ബന്ധപ്പെട്ട പുതിയ സർക്കാർ ഉത്തരവിൽ അവ്യക്ത‍തയുണ്ടെന്നും അതിൽ കൃത്യത വരുത്തിയി‍ല്ലെങ്കിൽ സുപ്രീംകോടതിയിൽ നിന്നു തിരിച്ചടി നേരിടേണ്ടി വരുമെന്നും പ്രതിപക്ഷ നേതാവ് വി.ഡി. സതീശൻ. 

ഈ ഉത്തരവുമായി മുന്നോട്ടു പോയാൽ ജനവാസ കേന്ദ്രങ്ങളെ ബഫർ സോണിൽ നിന്ന് ഒഴിവാക്കുകയെന്ന ലക്ഷ്യം നടക്കില്ല. 2019 ഒക്ടോബർ 31 ന് ഇടതു സർക്കാർ പുറത്തിറക്കിയ ഉത്തരവ് റദ്ദാക്കണം. സർക്കാരിന് പിടിവാശിയും അപകർഷതാബോധ‍വുമാണ്. മന്ത്രിസഭ ഒരു തീരുമാനം എടുത്താൽ ആ തീരുമാനമാണു നിലനിൽക്കുന്നത്. മന്ത്രി വിളിച്ചു കൂട്ടിയ യോഗത്തിലെ തീരുമാനമല്ല നിലനിൽക്കുക.

പഴയ ഉത്തരവ് റദ്ദാക്കിയെന്നു പുതിയ ഉത്തരവിൽ കൃത്യമായി പറയണം. 2019 ലെ ഉത്തരവിന്റെ കൂടെയാണ് സർക്കാർ ഇപ്പോഴുമുള്ളത്. തെറ്റ് സമ്മതിക്കാതെ പഴയ ഉത്തരവിലെ തെറ്റിനെ ന്യായീകരിക്കാനുള്ള  ഉപന്യാ‍സമാണ് പുതിയ ഉത്തരവെന്നും സതീശൻ പറഞ്ഞു.

English Summary: V.D. Satheesan on buffer zone