കത്ത് വിവാദം: കോർപറേഷൻ വാദം പരിഗണിക്കാതെ ഓംബുഡ്സ്മാൻ

തിരുവനന്തപുരം ∙ മറ്റ് അന്വേഷണങ്ങൾ നടക്കുന്നതിനാൽ കോർപറേഷനിലെ താൽക്കാലിക നിയമനത്തിനുള്ള മേയറുടെ കത്തി‍ൻമേൽ പരിശോധന വേണ്ടെന്ന കോർപറേഷൻ വാദം തദ്ദേശ സ്ഥാപനങ്ങൾക്കു വേണ്ടിയുള്ള ഓംബുഡ്സ്മാ‍ൻ പരിഗണിച്ചില്ല.  പരാതിയിൽ 27 ന് വിശദ‌വാദം കേൾക്കും. മേയർ ആര്യ രാജേന്ദ്രന്റെയും കോർപറേഷൻ സെക്രട്ടറി ബിനു ഫ്രാൻസിസിന്റെയും വാദങ്ങളാണ് ഓംബുഡ്സ്മാൻ പരിഗണിക്കാത്തത്. 

വിഷയം ഹൈക്കോടതിയുടെ പരിഗണനയിലായതിനാൽ ഇത് അന്വേഷിക്കാൻ ഓംബുഡ്സ്മാന് അധികാരമില്ലെന്നും മേയറുടെ കത്തിനെ സംബന്ധിച്ച് കോർപറേഷൻ രേഖകളിൽ പരാമർശം ഇല്ലെന്നു‍മായിരുന്നു സെക്രട്ടറി ഓംബുഡ്സ്‍മാനോട് വിശദീകരിച്ചത്. കോർപറേഷനിലെ കരാർ നിയമനത്തിന് കത്തു നൽകിയതിനെക്കുറിച്ച് അന്വേഷിക്കുക, ആര്യ രാജേന്ദ്രൻ മേയറായി ചുമതല‍യേറ്റതു മുതലുള്ള താൽക്കാലിക നിയമനങ്ങൾ അന്വേഷിക്കുക തുടങ്ങിയ ആവശ്യങ്ങളുന്നയിച്ച് യൂത്ത് കോൺഗ്രസ് നേതാവ് സുധീർ‍ഷാ പാലോടാണ് ഓംബുഡ്സ്മാനു പരാതി നൽകിയത്.

English Summary: Trivandrum corporation letter row