5.69 ലക്ഷം വോട്ടർമാർ കുറഞ്ഞു

തിരുവനന്തപുരം ∙ ആധാർ നമ്പർ ശേഖരിച്ച് ഇരട്ടിച്ച പേരുകൾ നീക്കം ചെയ്യൽ യജ്ഞം തുടങ്ങിയ ശേഷം ആദ്യമായി പ്രസിദ്ധീകരിച്ച ലോക്സഭാ, നിയമസഭാ അന്തിമ വോട്ടർ പട്ടികയിൽ 5.69 ലക്ഷം വോട്ടർമാർ കുറഞ്ഞു. 2022 ജനുവരിയിൽ പ്രസിദ്ധീകരിച്ച പട്ടികയിൽ 2,73,65,345 വോട്ടർമാരാണുണ്ടായിരുന്നത്. ഇരട്ടിച്ചവരെയും സ്ഥലം മാറിപ്പോയവരെയും മരിച്ചവരെയും നീക്കി ഇന്നലെ പ്രസിദ്ധീകരിച്ച പുതിയ പട്ടികയിൽ ആകെ വോട്ടർമാർ 2,67,95,581 ആണ്. 5 ലക്ഷത്തിലേറെപ്പേർ ഒഴിവാക്കപ്പെട്ടത് പട്ടിക ശുദ്ധീകരിക്കപ്പെട്ടതിന്റെ തെളിവാണെന്ന് മുഖ്യ തിരഞ്ഞെടുപ്പ് ഓഫിസർ സഞ്ജയ് എം. കൗൾ പറഞ്ഞു. പട്ടിക വെബ്സൈറ്റിലും (www.ceo.kerala.gov.in) താലൂക്ക് ഓഫിസുകളിലും വില്ലേജ് ഓഫിസുകളിലും ബൂത്ത് ലെവൽ ഓഫിസറുടെ പക്കലും ലഭിക്കും.

English Summary: Voters list for loksabha assembly final voters list