കാറപകടം: അഡീഷനൽ ചീഫ് സെക്രട്ടറിമാരായ വേണുവിനും ഭാര്യ ശാരദയ്ക്കും ഉൾപ്പെടെ പരുക്ക്

കായംകുളം ∙ ആഭ്യന്തര അഡീഷനൽ ചീഫ് സെക്രട്ടറി ഡോ. വി.വേണു, തദ്ദേശഭരണ അഡീഷനൽ ചീഫ് സെക്രട്ടറി ഭാര്യ ശാരദ മുരളീധരൻ, മകൻ ശബരി എന്നിവർ ഉൾപ്പെടെ ഏഴുപേർക്ക് കാറപകടത്തിൽ പരുക്കേറ്റു. ഇവർ സഞ്ചരിച്ച കാർ ഞായർ രാത്രി ഒന്നോടെ ദേശീയപാതയിൽ ലോറിയുമായി കൂട്ടിയിടിക്കുകയായിരുന്നു. വേണുവിനും ഡ്രൈവർ അഭിലാഷിനും സാരമായ പരുക്കുണ്ട്. ശാരദ, ശബരി, കുടുംബസുഹൃത്തുക്കളായ പ്രണവ്, സൗരവ്, ഗൺമാൻ സുഭാഷ് കുമാർ എന്നിവർക്കു നിസ്സാര പരുക്കേറ്റു.

പരുമലയിലെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ച വേണുവിന്റെ നില തൃപ്തികരമാണെന്ന് ആശുപത്രി അധികൃതർ പറഞ്ഞു. മൂക്കിലെ അസ്ഥിയിൽ പൊട്ടലുണ്ട്. രണ്ടു പല്ലുകൾ ഇളകി. സീറ്റ് ബെൽറ്റ് മുറുകിയതിനാൽ അടിവയറ്റിൽ ചെറിയ മുറിവുണ്ടായി. 

കൊച്ചി ബിനാലെ കണ്ടശേഷം തിരുവനന്തപുരത്തേക്കു മടങ്ങുകയായിരുന്ന ഇവരുടെ കാർ എതിരെ വന്ന ലോറിയുമായാണു കൂട്ടിയിടിച്ചത്. ദേശീയപാത പൊട്ടിപ്പൊളിഞ്ഞ് ഏറ്റവും മോശം അവസ്ഥയിലുള്ള ഭാഗത്താണ് അപകടം. കുഴിയിൽ വീഴാതിരിക്കാൻ വാഹനങ്ങൾ വെട്ടിത്തിരിച്ചപ്പോൾ അപകടത്തിൽ പെട്ടതാണോയെന്നു സംശയിക്കുന്നു. അതേസമയം, കാർ അമിതവേഗത്തിലായിരുന്നെന്നാണ് മോട്ടർ വാഹന വകുപ്പിന്റെ നിഗമനം.  

English Summary: Home Secretary V Venu car accident