വന്ദേഭാരത് ആദ്യ യാത്ര ബിജെപി തരംതാണ രാഷ്ട്രീയത്തിന് ഉപയോഗിച്ചു: കെ. മുരളീധരൻ

തിരുവനന്തപുരം ∙ കേരളത്തിലെ രണ്ടാം വന്ദേഭാരത് ട്രെയിനിന്റെ ആദ്യ യാത്രയെ ബിജെപി രാഷ്ട്രീയയാത്രയായി മാറ്റിയെന്നു കോൺഗ്രസ് നേതാവ് കെ.മുരളീധരൻ എംപി. സ്വീകരണയാത്രയെ ബിജെപി തരംതാണ രാഷ്ട്രീയത്തിന് ഉപയോഗിച്ചു. പ്രധാനമന്ത്രി നരേന്ദ്ര മോദി ഓൺലൈനായാണു ചടങ്ങ് ഉദ്ഘാടനം ചെയ്തത്.

ചടങ്ങ് നടന്ന സ്ഥലത്തെ എംഎൽഎയെ സംസാരിക്കാൻ അനുവദിക്കാതിരുന്നതു മുതൽ തറക്കളി ആരംഭിച്ചു. കേന്ദ്ര മന്ത്രി വി. മുരളീധരനായിരുന്നു ഇതിനൊക്കെ പിന്നിൽ. സഹമന്ത്രിയുടെ ഡൽഹിയിലെ റോൾ എന്താണെന്നറിയാം. ഇല്ലാത്ത പത്രാസ് ഇവിടെ കാണിക്കരുത്. പ്രധാനമന്ത്രി വരുമ്പോൾ പിന്നാലെ നടക്കുന്നതാണ് ഇവരുടെ പണി. കൂടുതലൊന്നും പറയുന്നില്ല. 

എറണാകുളം മുതൽ ആലപ്പുഴ വരെ പാസഞ്ചർ ട്രെയിൻ പോലെയാണു വന്ദേഭാരത് സഞ്ചരിച്ചത്. കേരളത്തിലെ എല്ലാ ബിജെപിക്കാരെയും അണിനിരത്തി. ബിജെപി ഓഫിസിൽ ഇരുന്നുള്ള യാത്ര പോലെയാണു തോന്നിയത്. – കെ.മുരളീധരൻ പറഞ്ഞു.

English Summary: Congress leader K Muraleedharan MP criticized the BJP for turning the first journey of the Vande Bharat train as a political campaign