തിരുവനന്തപുരം ∙ സംസ്ഥാനത്തു മിക്ക ജില്ലകളിലും പെയ്യുന്ന കനത്ത മഴ 5 ദിവസത്തേക്കുകൂടി തുടർന്നേക്കും. അറബിക്കടലിൽ രൂപപ്പെട്ട ന്യൂനമർദം തീവ്രന്യൂനമർദമായി മാറിയതാണു കാരണം. വടക്കുകിഴക്കൻ ബംഗാൾ ഉൾക്കടലിനു മുകളിലായി മറ്റൊരു ന്യൂനമർദം സ്ഥിതി ചെയ്യുന്നുണ്ട്. മലയോര മേഖലകളിൽ കൂടുതൽ മഴ ലഭിച്ചേക്കും.

ഇന്നലെ രാവിലെ മുതൽ ഉച്ചവരെ തെക്കൻ ജില്ലകളിലും ഉച്ചയ്ക്കു ശേഷം മധ്യ–വടക്കൻ ജില്ലകളിലും കനത്ത മഴ ലഭിച്ചു. ഇന്നലെയോടെ 4 മാസം നീണ്ട കാലവർഷ സീസൺ ഔദ്യോഗികമായി അവസാനിച്ചു. ഇനി പെയ്യുന്ന മഴ തുലാവർഷക്കണക്കിലാണ് ഉൾപ്പെടുത്തുക. ആലപ്പുഴ, എറണാകുളം, തൃശൂർ, കോഴിക്കോട്, കണ്ണൂർ ജില്ലകളിൽ ഇന്ന് യെലോ അലർട്ട് പ്രഖ്യാപിച്ചിട്ടുണ്ട്.

ദേശീയപാതയിലേക്ക് മരം കടപുഴകി വീണു

കനത്ത മഴയിൽ നദികളിൽ ജലനിരപ്പ് ഉയർന്നെങ്കിലും പ്രളയഭീതിയില്ല. ഗവിയിലേക്കുള്ള പ്രവേശനം നിർത്തിവച്ചു. കുട്ടനാട്, അപ്പർകുട്ടനാട് മേഖലകളിൽ ജലനിരപ്പ് ഉയർന്നു നിൽക്കുന്നു. പൊൻകുന്നത്ത് ഗവ. സ്കൂൾ വളപ്പിൽ നിന്ന മരം ദേശീയ പാതയിലേക്ക് കടപുഴകി ട്രാൻസ്ഫോമറിനു മുകളിൽ വീണെങ്കിലും അപകടം ഒഴിവായി.

English Summary: Extreme Low Pressure: 5 more days of heavy rain expected