മോൻസൻ കേസ്: കണ്ടുകെട്ടിയ സ്വത്തിന്റെ വിശദ വിവരം ഇ.ഡി. നൽകണമെന്ന് ഹൈക്കോടതി

കൊച്ചി ∙ മോൻസൻ മാവുങ്കൽ പ്രതിയായ പുരാവസ്തു തട്ടിപ്പ് കേസിൽ ഇ.ഡി ഉൾപ്പെടുത്തിയ സ്വത്തിന്റെ വിശദാംശങ്ങൾ അറിയിക്കാൻ ഹൈക്കോടതി നിർദേശം നൽകി. കേസിൽ കുടുംബസ്വത്ത് ഉൾപ്പെടെ കണ്ടുകെട്ടിയ നടപടിക്കെതിരെ മോൻസന്റെ മക്കളായ മാനസ് മോൻസൻ, ഡോ.മിമിഷ എന്നിവർ നൽകിയ ഹർജിയിലാണ് ജസ്റ്റിസ് ടി.ആർ.രവി നിർദേശം നൽകിയത്. ഹർജി അടുത്തയാഴ്ച വീണ്ടും പരിഗണിക്കും. 

കേസിനെ തുടർന്ന് മോൻസന്റെ ചേർത്തലയിലെ വീടും ഭാര്യയുടെയും മക്കളുടെയും കെഎസ്എഫ്ഇ നിക്ഷേപങ്ങളും ഇ.ഡി കണ്ടുകെട്ടിയിരുന്നു. വീട് 2011ൽ കുടുംബസ്വത്തായി ലഭിച്ചതാണെന്നും കെഎസ്എഫ്ഇ ചിട്ടികൾ ഭാര്യയുടെ വരുമാനത്തിൽ നിന്ന് 2005 മുതൽ തുടങ്ങിയതാണെന്നുമാണ് ഹർജിക്കാരുടെ വാദം.