മൂന്നു സഭയുടെയും പ്രധാന നിർദേശങ്ങൾ നടപ്പായില്ല; ലോകകേരളസഭ നാലാം സമ്മേളനം നാളെ മുതൽ

തിരുവനന്തപുരം∙ ലോകകേരളസഭയുടെ നാലാം സമ്മേളനത്തിനു നാളെ  തുടക്കം. സ്ഥിരാംഗങ്ങൾക്കു പുറമേ 103 രാജ്യങ്ങളിൽനിന്നായി ഇരുനൂറോളം പ്രതിനിധികൾ പങ്കെടുക്കും. പ്രതിപക്ഷം ഇത്തവണയും  ബഹിഷ്കരിക്കുമെങ്കിലും പ്രതിപക്ഷ പ്രവാസി സംഘടനകൾക്കു വിലക്കില്ല. 

ഗവർണർ ആരിഫ് മുഹമ്മദ് ഖാൻ ക്ഷണം നിരസിച്ച സാഹചര്യത്തിൽ നാളെ അഞ്ചുമണിക്ക് നിശാഗന്ധി ഓഡിറ്റോറിയത്തിലെ സമ്മേളനത്തിൽ മുഖ്യമന്ത്രി പിണറായി വിജയനാണ് ഉദ്ഘാടകൻ. മൂന്നു ലോകകേരള സഭകളിലെയും പ്രധാന നിർദേശങ്ങളൊന്നും നടപ്പാക്കിയില്ലെന്നും വിദേശത്തെ മേഖലാ സമ്മേളനങ്ങളുടെ സ്പോൺസർഷിപ് കണക്കുകൾ പുറത്തുവിട്ടില്ലെന്നുമുള്ള ആക്ഷേപത്തിനിടെയാണു നാലാം സമ്മേളനം.