ദേശീയ ഗെയിംസ്: കളരിപ്പയറ്റിനെ ഒഴിവാക്കുന്നതിൽ പ്രതിഷേധിച്ച് സർക്കാർ

തിരുവനന്തപുരം∙ ദേശീയ ഗെയിംസിൽ കളരിപ്പയറ്റ് മത്സരയിനമായി നിലനിർത്താൻ ഡൽഹി ഹൈക്കോടതി ഉത്തരവിട്ടിട്ടും തയാറാകാത്ത ഇന്ത്യൻ ഒളിംപിക് അസോസിയേഷന്റെ (ഐഒഎ) നിലപാടിനെതിരെ സംസ്ഥാന സർക്കാർ. ഹൈക്കോടതി വിധിയെക്കുറിച്ച് അറിയില്ലെന്നും ഒരുക്കങ്ങൾ പൂർത്തിയായ സാഹചര്യത്തിൽ പുതിയ ഇനം ഉൾപ്പെടുത്തുന്നത് പ്രയാസമാണെന്നുമുള്ള ഐഒഎ പ്രസിഡന്റ് പി.ടി.ഉഷയുടെ നിലപാട് നിരുത്തരവാദപരമാണെന്നും തീരുമാനം പുനഃപരിശോധിക്കണമെന്നും മന്ത്രി വി.അബ്ദുറഹിമാൻ പറഞ്ഞു. 

‘കളരിപ്പയറ്റ് ഒഴിവാക്കിയെന്ന വിവരം അറിഞ്ഞപ്പോൾത്തന്നെ അതിനെതിരെ കേന്ദ്ര കായിക മന്ത്രാലയത്തിനും ഐഒഎയ്ക്കും കത്തെഴുതിയെങ്കിലും പ്രതികരണം ഉണ്ടായില്ല. മലയാളിയായ പി.ടി.ഉഷ അധ്യക്ഷയായിരിക്കുമ്പോൾ ഇത്തരത്തിലൊരു ഒഴിവാക്കലുണ്ടായത് അമ്പരപ്പിച്ചു. ലോകം അംഗീകരിച്ച ഈ ആയോധനകലയെ പ്രോത്സാഹിപ്പിക്കേണ്ട ചുമതലയുള്ള ആൾ തന്നെ അതിനെതിരെ നിലപാടെടുക്കുന്നത് അംഗീകരിക്കാനാകില്ല. കളരിപ്പയറ്റ് ഉൾപ്പെടുത്തണമെന്ന ആവശ്യത്തോട് ഉഷ നേരത്തേതന്നെ മുഖംതിരിച്ചതായി പരാതിയുണ്ട് ’– മന്ത്രി ആരോപിച്ചു.