ബ്രൂവറി: സർക്കാരിനെ വിമർശിച്ച് സി.രാധാകൃഷ്ണൻ

അങ്കമാലി ∙ എലപ്പുള്ളിയിൽ ബ്രൂവറി സ്ഥാപിക്കാനുള്ള സർക്കാർ നീക്കത്തെ രൂക്ഷമായി വിമർശിച്ച് നോവലിസ്റ്റ് സി.രാധാകൃഷ്ണൻ. ‘കേരളമെന്ന ഭൂമി‌യുടെ തൊലിയും മാറും കുത്തിക്കീറി ഉള്ള ചോരയുടെ, ശുദ്ധജലത്തിന്റെ തുള്ളി വരെ ഊറ്റിയെടുത്തു കള്ളു വാറ്റിയാൽ നാളെ നാടില്ലാത്ത അവസ്ഥയിലേക്ക് എത്തും. ഭരിക്കുന്നവരോടു പറഞ്ഞിട്ടു കാര്യമുണ്ടെന്നു തോന്നുന്നില്ല. എന്റെ 86–ാം വയസ്സിലെ ബുദ്ധികൊണ്ട് ഇതു മനസ്സിലാകുന്നില്ല’ – രാധാകൃഷ്ണൻ പറഞ്ഞു. കറുകുറ്റിയിൽ കേരള ഹിന്ദൂസ് ഓഫ് നോർത്ത് അമേരിക്കയുടെ (കെഎച്ച്എൻഎ) കേരള കോൺക്ലേവിൽ ആർഷദർശന പുരസ്കാരജേതാവ് ഡോ. എം.ലീലാവതിയെ പരിചയപ്പെടുത്തി പ്രസംഗിക്കുകയായിരുന്നു അദ്ദേഹം. കള്ള് ഉണ്ടാക്കിയാൽ ഇവിടെ സർവ സാമ്പത്തിക പുരോഗതിയും ഐശ്വര്യവും ഉണ്ടാകുമെന്നാണു കണ്ടെത്തൽ. അരുത് എന്നു പറയുന്നുവരോട‌ൊന്നും എന്തെങ്കിലും സന്മനസ്സ് കാണിക്കാൻ ഇവർ തയാറാകുന്നില്ല – സി.രാധാകൃഷ്ണൻ പറഞ്ഞു.