മകൾ മുങ്ങിമരിച്ചു; രക്ഷിക്കാൻ ശ്രമിച്ച അമ്മ ഗുരുതര നിലയിൽ

കോതമംഗലം∙ കോഴിപ്പിള്ളി പുഴയിൽ കുളിക്കാനിറങ്ങിയ അമ്മയും മകളും കയത്തിൽ പെട്ടു. മകൾ മരിച്ചു. അമ്മ ഗുരുതര നിലയിൽ ചികിത്സയിൽ. കോഴിപ്പിള്ളി ആര്യപ്പിള്ളിൽ അബിയുടെ മകൾ മരിയ (15) ആണു മരിച്ചത്. അബിയുടെ ഭാര്യ ജോമിനി (39) കോതമംഗലം മാർ ബസേലിയോസ് ആശുപത്രിയിൽ തീവ്രപരിചരണ വിഭാഗത്തിലാണ്. ഇന്നലെ വൈകിട്ട് ആറോടെ കോഴിപ്പിള്ളി പരത്തരക്കടവ് തടയണയ്ക്കു താഴെയാണ് അപകടം. മകളെ രക്ഷിക്കാൻ ശ്രമിക്കുമ്പോഴാണു ജോമിനി കയത്തിൽപെട്ടത്. ഇളയ മകൾ ജൂലിയ കരഞ്ഞു ബഹളം വച്ചപ്പോൾ സമീപവാസികളെത്തി അറിയിച്ചതോടെ അഗ്നിരക്ഷാസേനയെത്തി ഇരുവരെയും മുങ്ങിയെടുത്ത് ആശുപത്രിയിലെത്തിച്ചു.സെന്റ് അഗസ്റ്റി‍ൻസ് ഗേൾസ് ഹയർ സെക്കൻഡറി സ്കൂൾ 10–ാം ക്ലാസ് വിദ്യാർഥിയാണ്.