എയ്ഡഡ്: പ്രൊവിഷനൽ നിയമനം ലഭിച്ചവർക്കും സ്ഥാനക്കയറ്റമാകാം

തിരുവനന്തപുരം ∙ ഭിന്നശേഷി നിയമനം പൂർത്തിയാക്കാത്ത എയ്ഡഡ് സ്കൂളുകളിൽ താൽക്കാലികമായി നിയമനം ലഭിച്ചവരെ സീനിയോറിറ്റി അനുസരിച്ച് ഉയർന്ന തസ്തികകളിലും പരിഗണിക്കണമെന്നു പൊതുവിദ്യാഭ്യാസ ഡയറക്ടറുടെ സർക്കുലർ. ഉയർന്ന തസ്തികയിലെ ശമ്പളവും ഇവർക്ക് അനുവദിക്കണം. ഇതുമായി ബന്ധപ്പെട്ടു നിരസിച്ചതോ അപ്പീൽ പരിഗണനയിൽ ഉള്ളതോ ആയ എല്ലാ കേസുകളും മറ്റാരുടെയും അനുമതിക്കു കാത്തുനിൽക്കാതെ പുനഃപരിശോധിച്ചു തീർപ്പാക്കണം. താൽക്കാലിക നിയമനം നേടിയവർക്കും ഗ്രൂപ്പ് ഇൻഷുറൻസ് അംഗത്വം ഉറപ്പാക്കണം. ഭിന്നശേഷിക്കാരെ നിയമിച്ച സ്കൂളുകളിലെ മറ്റു നിയമനങ്ങൾ അംഗീകരിക്കുന്നതിനുള്ള നടപടികൾ വേഗം പൂർത്തിയാക്കണം. വീഴ്ചവരുത്തിയാൽ കൃത്യവിലോപമായി കണക്കാക്കുമെന്നും മുന്നറിയിപ്പു നൽകി.