പത്താംക്ലാസുകാരുടെ യാത്രയയപ്പിന് ലഹരിപ്പാർട്ടി

കാസർ‌കോട് ∙  നഗരത്തിലെ പ്രധാന വിദ്യാലയത്തിലെ 10–ാം ക്ലാസ് യാത്രയയപ്പ് ആഘോഷത്തിനിടെ ലഹരിപ്പാർട്ടി. കഞ്ചാവ് ഉപയോഗിച്ച വിദ്യാർഥികളെ പൊലീസ് പിടികൂടി. 12.6 ഗ്രാം കഞ്ചാവും കണ്ടെടുത്തു. പൊലീസുകാരന്റെ കൈ തിരിച്ചൊടിച്ച് കടന്നുകളയാൻ ശ്രമിച്ച കഞ്ചാവു വിൽപനക്കാരൻ കളനാട് സ്വദേശി കെ.കെ.സമീറിനെ പൊലീസ് സാഹസികമായി അറസ്റ്റ് ചെയ്തു. പരുക്കേറ്റ സിവിൽ പൊലീസ് ഓഫിസർ ചികിത്സയിലാണ്. 500 രൂപ നൽകി സമീറിൽനിന്നാണു കഞ്ചാവു വാങ്ങിയതെന്ന് കുട്ടികൾ മൊഴിനൽകിയിട്ടുണ്ട്. സ്റ്റേജിനു പിന്നിൽ 4 വിദ്യാർഥികൾ കഞ്ചാവുമായി നിൽപുണ്ടെന്ന് സഹപാഠികൾ നൽകിയ വിവരത്തെത്തുടർന്നു നടത്തിയ പരിശോധനയിലാണു കഞ്ചാവു കണ്ടെത്തിയത്. കുട്ടികളിൽ പലരും കഞ്ചാവ് ഉപയോഗിച്ചെന്നും കണ്ടെത്തി. ഇവരുടെ സാമൂഹിക സാഹചര്യം സംബന്ധിച്ച് റിപ്പോർട്ട് തയാറാക്കാനുള്ള ശ്രമത്തിലാണു പൊലീസ്.