ഇസ്മായിലിന്റെ സസ്പെൻഷൻ: തീരുമാനത്തിലേക്ക് സിപിഐ

തിരുവനന്തപുരം∙ മുതിർന്ന നേതാവ് കെ.ഇ.ഇസ്മായിലിനെ ആറുമാസത്തേക്ക് സസ്പെൻഡ് ചെയ്യാനുള്ള സിപിഐ സംസ്ഥാന നിർവാഹകസമിതിയുടെ ശുപാർശ ഇന്നാരംഭിക്കുന്ന സംസ്ഥാന കൗൺസിൽ ചർച്ച ചെയ്യും. പാർട്ടിക്കുള്ളിൽ ഇക്കാര്യത്തിൽ വ്യത്യസ്ത അഭിപ്രായങ്ങളുണ്ടെങ്കിലും നേതൃത്വത്തിന്റെ തീരുമാനം അംഗീകരിക്കാനാണു സാധ്യത.പാർട്ടി സമ്മേളനങ്ങളിൽ മത്സരങ്ങൾ വിലക്കിക്കൊണ്ടുള്ള സർക്കുലർ വിവാദമായ സാഹചര്യത്തിൽ കൗൺസിലിൽ ഇക്കാര്യം ഉയർന്നേക്കും. ഇന്നലെ നടന്ന നിർവാഹകസമിതി യോഗത്തിലും ഇക്കാര്യം ചിലർ ഉന്നയിച്ചു. ഇതുവരെ നടന്ന സമ്മേളനങ്ങളുടെ അവലോകനം, ജില്ലാ സമ്മേളനങ്ങളുടെ നടത്തിപ്പ്, തദ്ദേശ തിരഞ്ഞെടുപ്പ് ഒരുക്കങ്ങൾ, പാർട്ടി ഫണ്ട് തുടങ്ങിയവയും കൗൺസിൽ ചർച്ച ചെയ്യും.