പോക്സോ കേസ് എടുക്കാതെ മടക്കി; എസ്എച്ച്ഒയ്ക്കെതിരെ പരാതി

പത്തനംതിട്ട ∙ ഏഴു വയസ്സുകാരിയെ 70 വയസ്സുകാരൻ പീഡിപ്പിച്ച സംഭവത്തിൽ വനിതാ പൊലീസ് സ്റ്റേഷനിലെ എസ്എച്ച്ഒ കേസെടുക്കാൻ വിസമ്മതിച്ചെന്ന് പരാതി. പത്തനംതിട്ട വനിതാ സ്റ്റേഷൻ എസ്ഐക്കെതിരെയാണ് കുട്ടിയുടെ ബന്ധുക്കൾ ശിശുക്ഷേമ സമിതിക്കു (സിഡബ്ല്യുസി) പരാതി നൽകിയത്. പ്രതിയെ പിന്നീട് കോന്നി പൊലീസ് അറസ്റ്റ് ചെയ്തു. 

ട്യൂഷൻ ടീച്ചറുടെ പിതാവാണ് ഏഴു വയസ്സുകാരിയെ പീഡിപ്പിച്ചത്. ഈ പരാതിയുമായാണ് പിതാവ് പത്തനംതിട്ട വനിതാ പൊലീസ് സ്റ്റേഷനിലെത്തിയത്. അപ്പോൾ കേസെടുക്കാനാകില്ലെന്ന് പറഞ്ഞ് മടക്കിയയച്ചു. പ്രതിയുടെ ബന്ധുവിനെ വിവരങ്ങൾ അറിയിച്ചെന്നും ആരോപണമുണ്ട്. തുടർന്നാണു കുടുംബം ശിശുക്ഷേമ സമിതിയെ സമീപിച്ചത്. സിഡബ്ല്യുസി വഴി പരാതി നൽകിയപ്പോൾ പ്രതി മോഹനനെ കോന്നി പൊലീസ് അറസ്റ്റ് ചെയ്തു. പരാതി ജില്ലാ പൊലീസ് മേധാവിക്കു മുന്നിലെത്തി. ഇങ്ങനെ പരാതി വന്നിട്ടില്ലെന്നാണ് ആരോപണ വിധേയയായ വ്യക്തിയുടെ നിലപാട്. സിഡബ്ല്യുസി ആരോപണ വിധേയയായ എസ്ഐയിൽനിന്നു വിശദീകരണം തേടുമെന്നാണു സൂചന.