ഭൂമിക്കടിയിൽ മഴവെള്ള സംഭരണി; മുകളിൽ കറങ്ങുന്ന അരിവാൾ ചുറ്റിക

തിരുവനന്തപുരം ∙ പ്രകൃതിസൗഹൃദ രീതിയിൽ നിർമിച്ച പുതിയ എകെജി സെന്ററിൽ 20 കിലോവാട്ട് ശേഷിയുള്ള സോളർ പാനലും ഭൂമിക്കടിയിൽ മഴവെള്ള സംഭരണിയും. മണ്ണിലുള്ള പ്രകൃതിദത്ത ടൈലുകളാണ് ഉപയോഗിച്ചിരിക്കുന്നത്. കർട്ടനുകളെല്ലാം കൈത്തറി തുണിയിലാണ്. ഫർണിച്ചർ റബ്കോയുടേത്. 11 നിലകളുള്ള കെട്ടിടം 60,000 ചതുരശ്ര അടിയുണ്ട്. കെട്ടിടത്തിന് ഏറ്റവും മുകളിൽ, കറങ്ങുന്ന രീതിയിൽ പാർട്ടി ചിഹ്നമായ അരിവാൾ ചുറ്റിക സ്ഥാപിച്ചിട്ടുണ്ട്. ഓഫിസിനു മുന്നിൽ എകെജിയുടെ അർധകായ പ്രതിമ സ്ഥാപിച്ചെങ്കിലും അനാഛാദനം ഉണ്ടായില്ല. ഉദ്ഘാടനച്ചടങ്ങിൽ എകെജിയെ കാര്യമായി അനുസ്മരിച്ചതു ജനറൽ സെക്രട്ടറി എം.എ.ബേബി മാത്രം. ഓഫിസിനായി സ്ഥലം കണ്ടെത്തിയതടക്കമുള്ള പ്രവർത്തനങ്ങൾക്കു നേതൃത്വം നൽകിയ അന്തരിച്ച സംസ്ഥാന സെക്രട്ടറി കോടിയേരി ബാലകൃഷ്ണനെ മുഖ്യമന്ത്രിയടക്കമുള്ളവർ അനുസ്മരിച്ചു.