‘ഹോർത്തൂസ് മലയാളം പാഠശാല’ സിനിമയെ കണ്ടറി​ഞ്ഞ് രണ്ടാം ദിവസം

കോട്ടയം ∙ കഥയും തിരക്കഥയും സിനിമയും ചർച്ചയാക്കി ‘ഹോർത്തൂസ് മലയാളം പാഠശാല’ രണ്ടാം ദിവസം പിന്നിട്ടു.  നൈപുണ്യവികസന കേന്ദ്രമായ കൊച്ചി ഐഎസ്എസ്ഡിയുടെ സഹകരണത്തോടെ മനോരമ കുട്ടികൾക്കായി സംഘടിപ്പിക്കുന്ന അവധിക്കാല ക്യാംപ് ദിവസവും രാവിലെ 9 മുതൽ 1.30 വരെയാണ്. ശനിയാഴ്ച സമാപിക്കും. നടനും സംവിധായകനുമായ ജോണി ആന്റണി ക്യാംപ് ഉദ്ഘാടനം ചെയ്തു. കൊച്ചി ഐഎസ്എസ്ഡി ചെയർമാൻ എം.വി.തോമസ്, മലയാള മനോരമ മാർക്കറ്റിങ് വൈസ് പ്രസിഡന്റ് വർഗീസ് ചാണ്ടി, ചീഫ് ന്യൂസ് എഡിറ്റർ വിനോദ് നായർ, സ്പെഷൽ കറസ്പോണ്ടന്റ് രാജു മാത്യു, ക്യാംപ് ഡയറക്ടർ സേതു പാർവതി എന്നിവർ പ്രസംഗിച്ചു. സംവിധായകൻ ജയരാജ്, ജില്ലാ പൊലീസ് മേധാവി എ.ഷാഹുൽ ഹമീദ്, എഴുത്തുകാരനും തിരക്കഥാകൃത്തുമായ ജി.ആർ.ഇന്ദുഗോപൻ എന്നിവർ കുട്ടികളുമായി സംവദിച്ചു. 

കുട്ടികൾ ജില്ലാ പൊലീസ് മേധാവിയുടെ സാന്നിധ്യത്തിൽ ലഹരിവിരുദ്ധ പ്രതിജ്ഞയെടുത്തു. കടലാസുകൊണ്ട് ലഹരി വസ്തുക്കളുടെ പ്രതീകാത്മക മാതൃകകൾ തയാറാക്കി, അവയെല്ലാം കൂട്ടിയിട്ട് കത്തിച്ച് ലഹരിക്കെതിരെയുള്ള പ്രവർത്തനങ്ങൾക്കും തുടക്കം കുറിച്ചു. ഗിന്നസ് റെക്കോർഡ് ഉടമയായ ചിത്രകാരൻ രാജശേഖരൻ പരമേശ്വരൻ ചിത്രകലയെക്കുറിച്ച് ഇന്ന് 10നു ക്ലാസ് നയിക്കും. തുടർന്ന് റോബട്ടിക്സ്, നിർമിതബുദ്ധി വിഷയങ്ങളിൽ ക്ലാസ്.