ആലപ്പുഴയിലെ സ്വർണവ്യാപാരിയുടെ കസ്റ്റഡി മരണം; സയനൈഡ് മൂലമെന്ന് സ്ഥിരീകരണം

ആലപ്പുഴ ∙ പൊലീസ് കസ്റ്റഡിയിലിരിക്കെ സ്വർണവ്യാപാരി പൊന്നാട് പണിക്കപ്പറമ്പിൽ രാധാകൃഷ്ണൻ (63) മരിച്ചത് സയനൈഡ് ഉള്ളിൽ ചെന്നാണെന്നു സ്ഥിരീകരിച്ചു. ആന്തരികാവയവങ്ങളുടെ രാസപരിശോധനാഫലത്തിലാണ് ഇക്കാര്യം സ്ഥിരീകരിച്ചത്. സയനൈഡ് ഇദ്ദേഹത്തിന്റെ ജ്വല്ലറിയിൽ നിന്നുള്ളതാണോ എന്നതാണ് ഇനി സ്ഥിരീകരിക്കേണ്ടത്. അതേസമയം, മോഷണമുതൽ വാങ്ങിയെന്ന പരാതിയിൽ രാധാകൃഷ്ണനെ കസ്റ്റഡിയിലെടുത്ത കടുത്തുരുത്തി പൊലീസിന്റെ ഭാഗത്തു ചില ഗുരുതര വീഴ്ചകൾ സംഭവിച്ചതായി ആലപ്പുഴ ക്രൈംബ്രാഞ്ച് എസ്പി: എ.പി.ഷൗക്കത്തലിയുടെ നേതൃത്വത്തിലുള്ള അന്വേഷണസംഘത്തിന്റെ റിപ്പോർട്ടിൽ പരാമർശിക്കുന്നതായി വിവരമുണ്ട്.