Manoramaonline.com no longer supports Internet Explorer 8 or earlier. Please upgrade your browser.  Learn more »

മെഹബൂബയുടെ ആവശ്യം അംഗീകരിച്ച് കേന്ദ്രം; റമസാനിൽ കശ്മീരിൽ വെടിനിർത്തൽ

Indian Army Representative Image

ന്യൂഡൽഹി∙ റമസാൻ പ്രമാണിച്ചു ജമ്മു കശ്മീരിൽ‌ വെടിനിർത്തൽ കൊണ്ടുവരാൻ കേന്ദ്ര സർക്കാർ തീരുമാനം. പ്രാർഥനാ കാലത്ത് കശ്മീരിൽ വെടിനിർത്തൽ വേണമെന്നു മുഖ്യമന്ത്രി മെഹബൂബ മുഫ്തിയുടെ ആവശ്യപ്പെട്ടതു പരിഗണിച്ചാണ് ആഭ്യന്തര മന്ത്രാലയത്തിന്റെ നടപടി.

വിശ്വാസികൾക്കു സമാധാനപരമായി റമസാൻ ആചരിക്കുന്നതിനു വേണ്ടിയാണ് ഭീകരർക്കെതിരെയുള്ള സൈനിക നീക്കമുൾപ്പെടെയുള്ളവ നിർത്തിവച്ചതെന്നു കേന്ദ്രമന്ത്രി രാജ്നാഥ് സിങ് വ്യക്തമാക്കി. പ്രശ്നങ്ങളൊന്നുമില്ലാതെ റമസാൻ കടന്നുപോകുന്നതിന് എല്ലാവരും സഹകരിക്കുമെന്നാണു പ്രതീക്ഷ. അക്രമത്തിലൂടെ മതത്തെ മോശപ്പെടുത്താൻ ശ്രമിക്കുന്നവരെ ഒറ്റപ്പെടുത്തണമെന്നു കേന്ദ്ര ആഭ്യന്തര മന്ത്രാലയം അറിയിച്ചു.

അതേസമയം സാധാരണക്കാരുടെ ജീവൻ സംരക്ഷിക്കുന്നതിനുള്ള നീക്കങ്ങളിൽ നിന്നു സുരക്ഷാ സേന പിന്നോട്ടു പോകില്ലെന്നും അറിയിപ്പുണ്ട്. ഇതു ഭീകരവാദികൾക്കുള്ള ആനുകൂല്യമല്ല. ശരിയായി ചിന്തിക്കുന്ന യുവാക്കൾ വിദ്യാഭ്യാസവും നല്ല ജീവിതവും സമാധാനവുമാണ് ആഗ്രഹിക്കുന്നത്– ആഭ്യന്തര മന്ത്രാലയം വ്യക്തമാക്കി.

പ്രധാനമന്ത്രിക്കും ആഭ്യന്തര മന്ത്രിക്കും കശ്മീർ മുഖ്യമന്ത്രി നന്ദി അറിയിച്ചു. സമാധാനം നടപ്പാക്കാൻ‌ ഇരുവരും നടത്തിയ ഇടപെടലിനെ മെഹബുബ ട്വിറ്ററിൽ പ്രശംസിച്ചു. സർക്കാര്‍ രേഖകൾ പ്രകാരം കഴിഞ്ഞ നാലു മാസത്തിനുള്ളിൽ 65 ഭീകരരെയാണു കശ്മീരിൽ‌ സൈന്യം വധിച്ചിട്ടുള്ളത്. ഇക്കാലയളവിൽ 41 കശ്മീരി യുവാക്കള്‍ വിവിധ ഭീകര സംഘടനകളില്‍ ചേർന്നെന്നാണു കണക്ക്.

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.