കൊച്ചി ∙ ഉപജീവനത്തിനായി മീൻ വിറ്റ കോളജ് വിദ്യാർഥിനി ഹനാനെ സമൂഹമാധ്യമങ്ങളിലൂടെ അപമാനിച്ച കേസിൽ ഒരാൾ കൂടി പിടിയിൽ. കൊല്ലം സ്വദേശി സിയാസ് ആണു പിടിയിലായത്. ഹനാനെ അപമാനിച്ച ഗുരുവായൂർ ചെറായി സ്വദേശി പയ്യനാട്ടയിൽ വിശ്വനാഥനെ (42) പൊലീസ് ഇന്നലെ അറസ്റ്റ് ചെയ്തിരുന്നു. ഇയാളെ കോടതി റിമാൻഡ് ചെയ്തു. ഹനാനെതിരെ ഗുരുതരമായ ആരോപണങ്ങളാണ് ഇയാൾ സമൂഹമാധ്യമങ്ങളിൽ ഉന്നയിച്ചതെന്നു പൊലീസ് അറിയിച്ചു.
സൈബർ സെല്ലിന്റെ സഹായത്തോടെ നടത്തിയ അന്വേഷണത്തിൽ, വിദ്യാർഥിനിയെ രൂക്ഷമായി അധിക്ഷേപിച്ച പത്തു പേരെ പൊലീസ് തിരിച്ചറിഞ്ഞിട്ടുണ്ട്. ഇവർക്കെതിരെ അടുത്ത ദിവസങ്ങളിൽ നടപടിയുണ്ടാകും. ഇതിൽ ഉൾപ്പെട്ട ഓൺലൈൻ മാധ്യമ പ്രവർത്തകനെ ചോദ്യം ചെയ്തു വിട്ടയച്ചു.
×
