കോട്ടയം നഗരത്തിൽ വ്യാപാരസ്ഥാപനത്തിൽ അഗ്നിബാധ; ഗതാഗതക്കുരുക്ക്
Mail This Article
കോട്ടയം ∙ നഗരമധ്യത്തിലെ ഗാന്ധിസ്ക്വയറിനു സമീപം ഇലക്ട്രോണിക്സ് അപ്ലയൻസസ് സ്ഥാപനത്തിൽ ഉണ്ടായ അഗ്നിബാധയെത്തുടർന്ന് കോട്ടയം നഗരം സ്തംഭിച്ചു. വൈകിട്ട് 5.10 നാണ് തിരക്കേറിയ നഗരമധ്യത്തിലെ ഷോറൂമിൽ അഗ്നിബാധ ഉണ്ടായത്.
ഒരു വഴിയാത്രക്കാരൻ തീപിടിത്തം കണ്ടതിനെത്തുടർന്ന് ഗാന്ധിസ്ക്വയറിൽ ഡ്യൂട്ടിയിലുണ്ടായിരുന്ന പൊലീസിനെ അറിയിക്കുകയും തുടർന്ന് പൊലീസ് ഫയർഫോഴ്സിനെ അറിയിക്കുകയും ചെയ്തു. 5.30 ഓടെ കോട്ടയം ഫയർ ഫോഴ്സ് ഓഫിസിൽ നിന്നും എത്തിയ സംഘം തീയണയ്ക്കാൻ ആരംഭിച്ചെങ്കിലും നിയന്ത്രണവിധേയമായില്ല.
തുടർന്ന് ചങ്ങനാശേരിയിൽ നിന്നെത്തിയ ഫയർഫോഴ്സ് സംഘവും ചേർന്ന് ഏറെ നേരത്തെ പരിശ്രമത്തിനൊടുവിൽ 6.45 ഓടെ തീയണച്ചു. ആറ് ഫയർഫോഴ്സ് യൂണിറ്റുകൾ എംസി റോഡിൽ നിരന്നതോടെ കോട്ടയം നഗരത്തിൽ മണിക്കൂറോളം ഗതാഗതം സ്തംഭിച്ചു. പൊലീസുകാർ വാഹനങ്ങൾ നിയന്ത്രണവിധേയമാക്കിയെങ്കിലും കാഴ്ചക്കാരായി കൂടുതൽ ആളുകളെത്തിയതാണ് പൊലീസിനെ വലച്ചത്.
