പുല്‍വാമയ്ക്കു പിന്നാലെ കശ്മീരില്‍ സൈനികര്‍ക്ക് സൗജന്യ വിമാനയാത്ര നടപ്പാക്കി കേന്ദ്രം
Mail This Article
പുല്‍വാമ ഭീകരാക്രമണത്തിനു പിന്നാലെ സൈനിക നീക്കത്തിന് നിര്‍ണായക തീരുമാനവുമായി കേന്ദ്ര ആഭ്യന്തരമന്ത്രാലയം. വ്യോമ മാര്‍ഗം സൈനികരെ എത്തിക്കാന്‍ തീരുമാനിച്ചത് സംബന്ധിച്ച് ഉത്തരവു പുറത്തിറങ്ങി. ഡല്‍ഹി-ശ്രീനഗര്‍, ശ്രീനഗര്‍-ഡല്‍ഹി, ജമ്മു-ശ്രീനഗര്‍, ശ്രീനഗര്‍-ജമ്മു എന്നിവിടങ്ങളിലേക്ക് വ്യോമമാര്‍ഗത്തിലൂടെ സൈനികരെ എത്തിക്കും. സെന്‍ട്രല്‍ ആംഡ് പാരാമിലിട്ടറി ഫോഴ്‌സിനെ (സിഎപിഎഫ്) ആകും ഇത്തരത്തില്‍ ലക്ഷ്യസ്ഥാനത്ത് എത്തിക്കുക.
ഇവിടെ ജോലി ആവശ്യമായി പോകുമ്പോഴോ, അവധിക്ക് നാട്ടിലേക്കു പോയിവരുമ്പോഴോ ആണ് ഈ സംവിധാനം പ്രയോജനപ്പെടുത്താന്‍ സാധിക്കുക. കോണ്‍സ്റ്റബിള്‍, ഹെഡ് കോണ്‍സ്റ്റബിള്‍, എഎസ്‌ഐ അടക്കം ഏകദേശം 7,80,000 പേര്‍ക്ക് ഈ സംവിധാനം പ്രയോജനപ്പെടും.
നിലവിലെ എയര്‍ കൊറിയര്‍ സര്‍വീസിന്റെ നിര്‍ദേശങ്ങളില്‍ മാറ്റം വരുത്തുകയാണ് ചെയ്തത്. ജവാന്മാരുടെ വീട്ടിലേക്കും തിരിച്ചുമുള്ള യാത്രയ്ക്കിടെ അനാവശ്യമായി സമയം നഷ്ടപ്പെടുന്നത് ഇതിലൂടെ പരിഹരിക്കാന്‍ കഴിയും. പുല്‍വാമ ഭീകരാക്രമണത്തിനു പിന്നാലെ ജവാന്മാരെ വാഹനങ്ങളില്‍ കൊണ്ടുപോകുന്നതിനെതിരെ വിമര്‍ശനമുയര്‍ന്നിരുന്നു. വ്യോമമാര്‍ഗത്തില്‍ കൊണ്ടുപോകണമെന്നും ആവശ്യമുയര്‍ന്നു.
