ഐസിയുവിൽ യുവതിയെ കൂട്ടമാനഭംഗം ചെയ്തു; ഡോക്ടറടക്കം പിടിയിൽ

മീററ്റ്∙ ഉത്തർപ്രദേശിലെ മീററ്റിൽ സ്വകാര്യ നഴ്സിങ് ഹോമിലെ ഐസിയുവിൽ ചികിത്സയിലായ 29കാരിയെ ആശുപത്രി ജീവനക്കാർ കൂട്ടമാനഭംഗത്തിന് ഇരയാക്കി. നാല് പുരുഷൻമാരും സ്ത്രീയും ഉൾപ്പെട്ട സംഭവത്തിൽ ഡോക്ടറടക്കം മൂന്നു പേർ പിടിയിലായി. ബാക്കിയുളളവർക്കായുളള തിരച്ചിൽ തുടരുന്നു. പിടിയിലായ സ്ത്രീ നഴ്സാണ്. പീഡനത്തിനിരയായ യുവതിക്ക് ബോധരഹിതയാവാനുളള കുത്തിവയ്പ് നൽകിയതിനാണ് ഇവരെ അറസ്റ്റ് ചെയ്തത്. ശനിയാഴ്ച രാത്രിയായിരുന്നു സംഭവം.

ശ്വസനസംബന്ധമായ അസുഖത്തെ തുടർന്നാണ് യുവതിയെ കഴിഞ്ഞ മാർച്ച് 21–നു സ്വകാര്യ ആശുപത്രിയിൽ പ്രവേശിപ്പിച്ചതെന്നു പൊലീസ് പറഞ്ഞു. പിന്നീട് നടത്തിയ പരിശോധനയിൽ കരളിൽ കൊഴുപ്പ് നിറഞ്ഞതായി കണ്ടെത്തി. ശനിയാഴ്ചയാണ് യുവതിയെ ഐസിയുവിലേക്ക് മാറ്റിയത്. അവിടെവച്ചു നഴ്സ് യുവതിക്ക് മയങ്ങാനുളള കുത്തിവയ്പ് നൽകി. തുടർന്ന് മൂന്നുപേർ ചേർന്നു യുവതിയെ പീഡിപ്പിച്ചു. സംഭവത്തിൽ‌ നിയാസ് (20), അശോക് മാലിക് (35), ഷദാബ് (23), ലക്ഷ്മി (50) എന്നിവർക്കെതിരെ ഐപിസി 376 വകുപ്പു പ്രകാരം കേസെടുത്തു.

സംഭവം നടന്നുവെന്നു കരുതപ്പെടുന്ന സമയത്ത് ഐസിയുവിലെ സിസിടിവി ക്യാമറ പ്രവർത്തനരഹിതമാക്കിയിരുന്നു. യുവതിയുടെ ഭർത്താവിന്റെ പരാതിയുടെ അടിസ്ഥാനത്തിലാണ് പൊലീസ് കേസെടുത്തത്. ബോധം തെളിഞ്ഞപ്പോൾ തന്റെ കിടക്കയിൽ വാർഡ് ബോയിയെ കണ്ട യുവതി സഹായത്തിനായി അലറി വിളിക്കുകയായിരുന്നു. യുവതിയുടെ നിലവിളി കേട്ട് ഭർത്താവ് ഐസിയുവിൽ ഓടിയെത്തിയപ്പോഴേക്കും കുറ്റവാളികൾ രക്ഷപ്പെട്ടതായും എഫ്ഐആറിൽ പറയുന്നു.

English Summary: Doctor among three held for ‘rape’ in ICU of nursing home at Meerut