മോഹൻ ഭഗവതിന്റെ അകമ്പടി വാഹനം ഇടിച്ച് ആറ് വയസ്സുകാരൻ മരിച്ചു

ജയ്പുർ ∙ ആർഎസ്എസ് മേധാവി മോഹൻ ഭഗവതിന് അകമ്പടി സേവിച്ച കാർ ഇരുചക്ര വാഹനവുമായി കൂട്ടിയിടിച്ച് ആറു വയസ്സുകാരൻ മരിച്ചു. മണ്ഡവാർ സ്വദേശി സച്ചിനാണ് മരിച്ചത്. പരുക്കേറ്റ സച്ചിന്റെ മുത്തച്ഛനെ ആശുപത്രിയിൽ പ്രവേശിപ്പിച്ചു.

ബുധനാഴ്ച രാത്രി രാജസ്ഥാനിലെ അൽവാറിലായിരുന്നു സംഭവം. തിജാരയിൽ പൊതുച്ചടങ്ങിൽ പങ്കെടുത്ത ശേഷം മോഹൻ ഭഗവത് മടങ്ങുമ്പോൾ അദ്ദേഹത്തിന് അകമ്പടി സേവിച്ച വാഹനങ്ങളിൽ ഒന്ന് സച്ചിനും മുത്തച്ഛനും സഞ്ചരിച്ച ഇരുചക്ര വാഹനവുമായി കൂട്ടിയിടിക്കുകയായിരുന്നു.

സംഭവത്തിൽ കാർ ഡ്രൈവർക്കെതിരെ കേസ് റജിസ്റ്റർ ചെയ്തതായും വാഹനം ഉടൻ കസ്റ്റഡിയിൽ എടുക്കുമെന്നും മാണ്ഡവാർ എസ്ഐ റാംസ്വരൂപ് ബൈരവ പറഞ്ഞു. പത്തോളം കാറുകളാണ് മോഹൻ ഭഗവതിന് അകമ്പടി സേവിച്ചിരുന്നത്. ഇസഡ് പ്ലസ് സുരക്ഷ ഉള്ള ആളാണ് മോഹൻ ഭഗവത്.