sections
MORE

എസിയിൽ വാഴും ഏമാന്മാർ, വാച്ചർക്ക് പച്ചില; മുന്നറിയിപ്പ് നൽകിയിട്ടും കൂട്ടക്കുരുതി

SHARE

തിവേഗത്തിൽ കൃത്യതയോടെ കാട്ടുതീ മുന്നറിയിപ്പ് നൽകാൻ കേന്ദ്ര വനം മന്ത്രാലയത്തിന്റെ കീഴിലുള്ള ഫോറസ്റ്റ് സർവേ ഓഫ് ഇന്ത്യ 2019 ജനുവരി 16ന് അവതരിപ്പിച്ച നൂതന സംവിധാനമാണു ഫാസ്റ്റ്. നാസ, ഐഎസ്ആർഒ, എഫ്എസ്ഐ എന്നിവ സഹകരിച്ചാണു സംവിധാനമൊരുക്കുന്നത്. ഉപഗ്രഹത്തെ ആശ്രയിച്ചുള്ള രണ്ടു സെൻസർ പ്ലാറ്റ്ഫോമുകളാണ് ഇതിനായി നാഷനൽ റിമോട്ട് സെൻസിങ് സെന്റർ (എൻആർഎസ്‌സി) ഉപയോഗിക്കുന്നത്: മോഡിസും (മോഡറേറ്റ് റസല്യൂഷൻ ഇമേജിങ് സ്പെക്ട്രോറേഡിയോമീറ്റർ) എസ്എൻപിപി–വിഐഐആർഎസും (വിസിബിൾ ഇൻഫ്രാറെഡ് ഇമേജിങ് റേഡിയോമീറ്റർ സ്യൂട്ട്– സൗമി നാഷനൽ പോളാർ ഓർബിറ്റിങ് പാർട്ണർഷിപ്പ്). 1999, 2002 വർഷങ്ങളിൽ നാസ വിക്ഷേപിച്ച ടെറ, അക്വ ഉപഗ്രഹങ്ങളിലാണു മോഡിസ്.

2011ൽ വിക്ഷേപിച്ച എസ്എൻപിപി ബഹിരാകാശ പേടകത്തിലാണു വിഐഐആർഎസ്. പലവിധ കാലാവസ്ഥാ മുന്നറിയിപ്പുകൾക്കായി ഉപയോഗിക്കുന്ന ഈ സെൻസറുകൾ, ഭൂമിയിൽ അതികഠിനമായി ചൂടുണ്ടാകുന്ന പ്രദേശങ്ങളെ കണ്ടെത്തി മാപ്പ് ചെയ്യുന്ന ‘ഹോട്‍സ്പോട്ടുകൾ’ ആണു കാട്ടുതീ പ്രദേശങ്ങളായി കണക്കാക്കുന്നത്. സെൻസറുകൾ ദിവസത്തിൽ രണ്ടു തവണ വീതം ഭൂമിയെ വലംവയ്ക്കും. ഫലത്തിൽ മൂന്നു സെൻസറുകളിൽനിന്നായി ആറു സെറ്റ് ഉപഗ്രഹ ഡേറ്റയാണു കാട്ടുതീയുമായി ബന്ധപ്പെട്ട് എഫ്സിഐയ്ക്കു ദിവസവും ലഭിക്കുക. ഒരു കിലോമീറ്റർ പ്രദേശത്തു തീയുണ്ടോയെന്ന് അറിയാൻ (റസല്യൂഷൻ 1 കി.മീ X 1 കി.മീ) മോഡിസും അതിനേക്കാൾ ചെറിയ തീ വ്യക്തമായി തിരിച്ചറിയാൻ (റസല്യൂഷൻ 375 മീ x 375 മീ) വിഐഐആർഎസും ഉപയോഗിക്കുന്നു.

തീപിടിത്തമുള്ള വനപ്രദേശം (ഹോട്‌സ്പോട്) കണ്ടെത്തുന്ന സാറ്റലൈറ്റുകൾ ഭൂമിയിലേക്കു സിഗ്നലുകൾ അയയ്ക്കുന്നതിൽനിന്ന് ആരംഭിക്കുന്നു അലർട്ട് സംവിധാനം. ഹൈദരാബാദിലെ എൻആർഎസ്‌സിക്കു കീഴിലെ ഗ്രൗണ്ട് സ്റ്റേഷൻ ആ സിഗ്നൽ സ്വീകരിക്കുന്നു. തെലങ്കാനയിലെ ഷാദ്നഗറിലാണു ഗ്രൗണ്ട് സ്റ്റേഷൻ. എൻആർഎസ്‌സിയിൽ നിന്ന് ഫോറസ്റ്റ് സര്‍വേ ഓഫ് ഇന്ത്യയിലേക്കു കാട്ടുതീ സംബന്ധിച്ച ഇമെയിൽ പോകുന്നു. ഭൂമിയിലെ ഏതെങ്കിലും മേഖല കേന്ദ്രീകരിച്ച് ചൂടിൽ എന്തു മാറ്റമുണ്ടായാലും അതെല്ലാം സാറ്റലൈറ്റിലെ സെൻസറുകൾ പിടിച്ചെടുക്കും. കാട്ടിലെയും പുറത്തെയും ഈ ചൂടുമാറ്റം ഇത്തരത്തിൽ എൻആർഎസ്‌സി കൈമാറും. ഇതിനെ തരംതിരിക്കുന്നത് എഫ്എസ്ഐയുടെ ജോലിയാണ്.

ഏതു സംസ്ഥാനത്താണു കാട്ടുതീയുണ്ടായത്? ജില്ല, ഡിവിഷൻ, റേഞ്ച്, ബീറ്റ്, കംപാർട്മെന്റ് ബൗണ്ടറി തുടങ്ങിയ വിവരങ്ങളെല്ലാം കാട്ടുതീ ലൊക്കേഷനൊപ്പം ചേർക്കുന്നതും എഫ്എസ്ഐയാണ്. ഈ വിവരങ്ങൾ സ്റ്റേറ്റ് നോഡൽ ഓഫിസർമാർക്കും നെറ്റ്‌വർക്കിലെ മറ്റ് റജിസ്റ്റേഡ് യൂസർമാർക്കും ഇമെയിലായും എസ്എംഎസായും അയയ്ക്കും. വിവരം ഉടനെ എഫ്എസ്ഐ വെബ്സൈറ്റിൽ ടേബിളായും ഭൂപടമായും ചേർക്കും. തുടർന്നു ബന്ധപ്പെട്ട സംസ്ഥാന വനംവകുപ്പ് ഓഫിസ് നടപടി സ്വീകരിക്കും. ഇതിന്റെ ഫീഡ്ബാക്ക് വൈകാതെതന്നെ എഫ്എസ്ഐയിലേക്കു തിരികെ അയയ്ക്കുകയും ചെയ്യും. തീപിടിത്തത്തോടുള്ള പ്രതികരണവും തുടർനടപടികളും രണ്ടു മണിക്കൂറിനുള്ളിൽ പൂർത്തിയാകുമെന്ന് എഫ്എസ്ഐ ഉദ്യോഗസ്ഥർ അവകാശപ്പെട്ടു.

മുന്നറിയിപ്പ് കിട്ടിയിട്ടും കൂട്ടക്കുരുതി

2019 നവംബർ ഒന്നു മുതൽ 2020 ഫെബ്രുവരി 24 വരെ ഏറ്റവും കൂടുതൽ ഫയർ അലർട് കിട്ടിയ സംസ്ഥാനം കർണാടകയാണ് (എസ്എൻപിപി 1432, മോഡിസ് 293). മഹാരാഷ്ട്ര, നാഗാലാൻഡ്, അരുണാചൽ പ്രദേശ്, ആന്ധ്രപ്രദേശ് സംസ്ഥാനങ്ങളും ആദ്യ അഞ്ചു സ്ഥാനക്കാരിലുണ്ട്. എന്നാൽ ഫെബ്രുവരി 17 മുതൽ 24 വരെയുള്ള കണക്കുപ്രകാരം കൂടുതൽ അലർട്ട് കിട്ടിയ സംസ്ഥാനങ്ങളിൽ കേരളം നാലാം സ്ഥാനത്താണെന്നത് ആശങ്കയുണ്ടാക്കുന്നു. എസ്എൻപിപി (142) മോഡിസ് (15) അലർട്ടുകൾ കൂട്ടിയാൽ എട്ടു ദിവസത്തിനിടെ 157 കാട്ടുതീ മുന്നറിയിപ്പുകളാണു കേരളത്തിനു കിട്ടിയത്. ഒരു പതിറ്റാണ്ടിനിടെ കേരളത്തിൽ അറുപതിനായിരത്തിലേറെ ഏക്കർ കാട് കത്തിനശിച്ചെന്നാണു കണക്ക്. 2009 മുതൽ 2019 വരെ ഉണ്ടായത് അയ്യായിരത്തോളം കാട്ടുതീ സംഭവങ്ങൾ.

കൊറ്റമ്പത്തൂർ ഇല്ലിക്കുണ്ട് വനമേഖലയിലെ തീപിടിത്തത്തെക്കുറിച്ചും എഫ്എസ്ഐ മുന്നറിയിപ്പ് നൽകിയിരുന്നു. കേരളത്തിലെ സെൻട്രൽ ഫോറസ്റ്റ് സർക്കിളിലെ തൃശൂർ ഡിവിഷന്റെ കീഴിലുള്ള വടക്കാഞ്ചേരി റേഞ്ചിൽ തീപിടിത്തം ഉണ്ടാകുമെന്ന അലർട്ട് ഞായർ ഉച്ചയ്ക്കു (ഫെബ്രുവരി 16) ഒരു മണി കഴിഞ്ഞാണെത്തിയത്. മൂന്നു വനപാലകർ വെറുംകയ്യോടെ തീകെടുത്തുന്നതിനിടെ വെന്തുമരിച്ചത് വൈകിട്ട് നാലരയോടെ. തീയുടെ വിവരം, കൃത്യമായ സ്ഥലം, ഭൂപടം ലഭിക്കുന്നതിനുള്ള ഓൺലൈൻ ലിങ്ക് എന്നിവ സഹിതമായിരുന്നു അറിയിപ്പ്. മൊബൈൽ എസ്എംഎസ്, ഇ–മെയിൽ അടക്കമുള്ള അലർട്ടുകൾ ലഭിച്ചിട്ടും വ്യക്തമായ ആസൂത്രണമില്ലാത്തതിനാൽ അധികൃതർ മൂന്നു പേരെ കൊലയ്ക്കു കൊടുത്തുവെന്നത് ഏവരെയും ഞെട്ടിക്കേണ്ടതാണ്.

ശാസ്ത്രീയവും ആധുനികവുമായ രീതിയിൽ എഫ്എസ്ഐ കാട്ടുതീ പ്രതിരോധ പ്രവർത്തനം മുന്നോട്ടു കൊണ്ടുപോയപ്പോൾ പാവം വാച്ചർമാർക്കും പ്രദേശവാസികൾക്കും കാടിനോടുള്ള ഇഷ്ടത്തെയാണു വനംവകുപ്പ് ഇപ്പോഴും ആശ്രയിക്കുന്നതും ചൂഷണം ചെയ്യുന്നതും. ജീവനക്കാര്‍ക്ക് ആവശ്യമായ സുരക്ഷാ ഉപകരണങ്ങളില്ല. വാച്ചര്‍മാര്‍ക്കു മെഡിക്കല്‍, ഇന്‍ഷുറന്‍സ് പരിരക്ഷയില്ല. മണ്ണും പച്ചിലയും മാത്രമാണു കാട്ടുതീ നേരിട്ടു കെടുത്തുന്നവർക്ക് വനംവകുപ്പ് ‘അനുവദിച്ചിട്ടുള്ളത്’. ജീവൻ പണയം വച്ചു തീ കെടുത്തേണ്ട ഉത്തരവാദിത്തം ഫയർ വാച്ചർമാർക്കാണ്. വകുപ്പിലെ ഉയര്‍ന്ന ഉദ്യോഗസ്ഥരാകട്ടെ ഉത്തരവുമിട്ട് ഓഫിസിന്റെ സുരക്ഷയിൽ ഇരിക്കും.

മുന്നറിയിപ്പ് സംവിധാനങ്ങൾ ആധുനികമായിട്ടും വേണ്ടപോലെ ഉപയോഗിക്കാതിരിക്കുന്ന വനംവകുപ്പ് തീ കെടുത്തൽ മാർഗങ്ങളിലും പഴഞ്ചനായി തുടർന്നു. തീയുമായി മല്ലിടുന്ന വാച്ചർമാരിൽ ഭൂരിഭാഗവും താൽക്കാലിക ജീവനക്കാരാണ്. അതിനാൽത്തന്നെ ഇവരുടെ ജോലിക്കോ ജീവനോ കാര്യമായ സുരക്ഷയില്ല. തൊഴിലിന്റെ കാഠിന്യമനുസരിച്ചുള്ള ശമ്പളവും ലഭിക്കുന്നില്ലെന്നു വാച്ചർമാർ പരാതിപ്പെടുന്നു. കാട്ടുതീ നിയന്ത്രിക്കാൻ കേരളത്തിലെ ദേശീയ ഉദ്യാനങ്ങള്‍ക്കു പോലും വേണ്ടത്ര പണം കിട്ടുന്നില്ലെന്നു വനംവകുപ്പിലെ ഉദ്യോഗസ്ഥരും പറയുന്നു. ഇതോടെ 30 പേരെ വരെ നിയമിച്ചിരുന്ന കാടുകളിൽ വിരലിൽ എണ്ണാവുന്നവരിലേക്കു വാച്ചർമാരുടെ എണ്ണം ചുരുക്കേണ്ടി വന്നുവെന്നാണു വനംവകുപ്പിന്റെ ന്യായം.

ക്ഷമിക്കണം, ഈ ഫണ്ട് ഞങ്ങൾക്ക്

പച്ചിലത്തലപ്പ് നൽകി ഫയർ വാച്ചർമാരെ തീക്കാട്ടിലേക്കു വിടുന്നതു വനംവകുപ്പിന് ഫണ്ടില്ലാത്തിനാലാണെന്നു കരുതിയാൽ തെറ്റി. വനസംരക്ഷണത്തിനുള്ള ഫണ്ട് വകമാറ്റിയാണെങ്കിലും ആഡംബരത്തിനു കുറവു വരുത്തില്ലെന്ന വാശിയിലാണ് ഒരു വിഭാഗം ഉദ്യോഗസ്ഥരെന്നു വനംവകുപ്പിലുള്ളവർ തന്നെ പറയുന്നു. പീച്ചിയിൽ സർവസൗകര്യങ്ങളോടെ അതിഥി മന്ദിരം, പറവട്ടാനിയിൽ ഓഫിസിനു സമീപത്തായി ഇൻഡോർ സ്റ്റേഡിയം എന്നിവ നിർമിക്കുന്നത്, പ്രാഥമിക സുരക്ഷാ ഉപകരണങ്ങളില്ലാതെ തീകെടുത്താനിറങ്ങി വനപാലകർ മരണപ്പെട്ട തൃശൂർ ജില്ലയിലാണ് എന്നതാണു ശ്രദ്ധേയം.

റേഞ്ച് ഫോറസ്റ്റ് ഓഫിസർമാർക്ക് എസി ജീപ്പുകൾ, വനംവകുപ്പിന് 21 പുത്തൻ മോഡൽ ഇന്നോവ കാറുകൾ എന്നിവ വാങ്ങുന്നതിനും ഫണ്ട് ദൗർലഭ്യമില്ല. ഫയർലൈൻ നിർമാണത്തിന്റെ മറവിൽ വൻവെട്ടിപ്പാണെന്നും പരിസ്ഥിതി പ്രവർത്തകർ ആരോപിക്കുന്നു. കരാറുകാരന് 10% ലാഭവിഹിതം ഉൾപ്പെടെ കിലോമീറ്ററിന് 30,500 രൂപയാണു ഫയർലൈനിന് അനുവദിക്കുന്നത്. 40 തൊഴിലാളികളാണു വേണ്ടത്. പലയിടങ്ങളിലും വനത്തെ ആശ്രയിച്ചു ജീവിക്കുന്നവരെ ഒഴിവാക്കി യന്ത്രങ്ങൾ കൊണ്ടു പുല്ലു മാത്രം നീക്കി പണം തട്ടുകയാണ്. ചെലവ് കിലോമീറ്ററിന് 5000 രൂപയിൽ താഴെ മാത്രം. ബാക്കിത്തുക ഉദ്യോഗസ്ഥരുൾപ്പെടെ വീതിച്ചെടുക്കും. ശാസ്ത്രീയമായി നിർമിക്കാത്ത ഫയർലൈൻ കാട്ടുതീ പടരുന്നതിനേ ഇടയാക്കൂ.

വനഭൂമിയിൽ 5.2 മീറ്റർ വീതിയിലുള്ള പ്രദേശത്തെ കരിയിലകൾ നടുഭാഗത്തു കൂട്ടി നിയന്ത്രണവിധേയമായി കത്തിച്ചും അടിക്കാടുകൾ വേരടക്കം ചെത്തിയെടുത്തുമാണു ഫയർലൈൻ നിർമിക്കുന്നത്. എന്നാൽ കൊറ്റമ്പത്തൂരിൽ തീപിടിത്തമുണ്ടായ പ്രദേശങ്ങളിലൊന്നും ഫയർലൈൻ ഉണ്ടായിരുന്നില്ലെന്നു നാട്ടുകാർ ചൂണ്ടിക്കാട്ടി. എച്ച്എൻഎൽ ആയിരുന്നു ഫയർലൈൻ തെളിക്കേണ്ടിയിരുന്നതെന്ന നിലപാടാണു വനംവകുപ്പിന്. വനത്തോടു ചേർന്നുള്ള നാട്ടുകാർക്കും വനാശ്രിതർക്കും ജോലി ഉറപ്പ‍ാക്കുകയും അവരെ വനസംരക്ഷണത്തിനു നിയോഗിക്കുകയും ലക്ഷ്യമിട്ട പദ്ധതി സ്വാർഥതാൽപര്യത്തിനായി നശിപ്പിച്ചു. മുൻഗണനകൾ മറ്റു പലതുമായതിനാൽ ഉദ്യോഗസ്ഥ സംഘത്തിനു വനസംരക്ഷണത്തിന്റെ ഉദ്ദേശ്യലക്ഷ്യങ്ങൾ പാലിക്കാനുമാകുന്നില്ല.

കാട്ടുതീ തടയാൻ ജനുവരി മുതൽ മാർച്ച് വരെയാണു പൊതുവെ ഫയർ വാച്ചർമാരെ നിയോഗിക്കാറുള്ളത്. മാർച്ചിൽ ഫണ്ട് തീരും, ഇവരുടെ സേവനകാലവും അവസാനിക്കും. ചൂടേറിയ ഏപ്രിൽ, മേയ് മാസങ്ങളിൽ കാട്ടുതീക്കു സാധ്യത കൂടുതലാണ്. അടുത്ത സാമ്പത്തിക വർഷത്തിൽ കാട്ടുതീ പ്രതിരോധ ഫണ്ട് വകയിരുത്തി അനുമതി ലഭിക്കാൻ ഓഗസ്റ്റ് വരെയാകാറുണ്ടെന്നു വാച്ചർമാർ ചൂണ്ടിക്കാട്ടുന്നു. ഈ സമയത്തു ജോലിക്കാരുടെ എണ്ണം കുറവായതിനാൽ കാട്ടുതീ കെടുത്തൽ പേരിനു മാത്രമാകും. പച്ചില കൂടാതെ ചിലയിടങ്ങളിൽ റബര്‍വള്ളി പിടിപ്പിച്ചുള്ള നീളമുള്ള ഇരുമ്പ് പൈപ്പ് ‘ഉപകരണവും’ തീകെടുത്താന്‍ നൽകിയിട്ടുണ്ട്. തല്ലിക്കെടുത്താനേ ഇതുകൊണ്ടും സാധിക്കൂ.

കാട്ടുതീ അണയ്ക്കാനും വന്യമൃഗങ്ങളെ തുരത്തുന്നതിനും രാത്രിയും പകലും ജോലി ചെയ്യുന്ന വനംവകുപ്പിലെ താൽക്കാലിക വാച്ചർമാർക്ക് ആവശ്യമായ സുരക്ഷാ സംവിധാനങ്ങൾ ഒരുക്കണമെന്നു കേരള ഫോറസ്റ്റ് വർക്കേഴ്സ് യൂണിയൻ (എഐടിയുസി) ആവശ്യപ്പെട്ടു. കാട്ടുതീ പ്രതിരോധ പ്രവർത്തനത്തിൽ താൽക്കാലിക ജീവനക്കാരുടെ സേവനമാണു കൂടുതലും ഉപയോഗപ്പെടുത്തുന്നത്. ഇവർക്ക് 30 ദിവസം ജോലി ചെയ്താലും ലഭിക്കുന്നത് 12  മുതൽ 18 ദിവസത്തെ കൂലിയാണ്. താൽക്കാലിക വാച്ചർമാർക്കു ജോലി ചെയ്യുന്ന മുഴുവൻ ദിവസത്തെ വേതനവും നൽകണമെന്നും ഫയർകോട്ടും ഫയർ മാസ്കും ഉൾപ്പെടെ സുരക്ഷാ കവചങ്ങൾ നൽകണമെന്നും യൂണിയൻ ആവശ്യപ്പെട്ടു.

കാട്ടുതീ മനുഷ്യസൃഷ്ടി, മഹാക്രൂരത

ജനുവരി മുതൽ ഏപ്രിൽ വരെയുള്ള മാസങ്ങളിലാണു കാട്ടുതീ വ്യാപകമാകുക. കത്തുന്ന ചൂടിനൊപ്പം കാറ്റും ആഞ്ഞു വീശുമ്പോൾ നിയന്ത്രണാതീതമാകും. പലതരത്തിലുള്ള കാട്ടുതീയുണ്ട്. ചെറിയ തീ മുതൽ മുച്ചൂടും മുടിക്കുന്ന അഗ്നിതാണ്ഡവം വരെ. അടിക്കാടു മുഴുവൻ കത്തിക്കരിയുന്ന സർഫസ് ഫയർ, ചെറിയ മരങ്ങളും അടിക്കാടും കത്തിനശിക്കുന്ന മിഡ് ലെവൽ ഫയർ, മരങ്ങളിലേക്കു തീപടർന്നു കാടു മുഴുവൻ നശിക്കുന്ന ക്രൗൺ ഫയർ, മണ്ണുപോലും വെന്തുപോകുന്നത്ര കഠിനമായ ഗ്രൗണ്ട് ഫയർ എന്നിവയാണിവ. ഇവയിൽ ഗ്രൗണ്ട് ഫയറാണു സംഭവിച്ചതെങ്കിൽ പ്രദേശം പൂർവസ്ഥിതിയിലാകാൻ നൂറ്റാണ്ടുകൾ വേണ്ടിവരുമെന്നു വനഗവേഷകർ വ്യക്തമാക്കി.

കേരളത്തിലുണ്ടാകുന്ന തീപിടിത്തങ്ങളെല്ലാം മനുഷ്യസൃഷ്ടിയാണെന്ന പരിസ്ഥിതി പ്രവർത്തകരുടെ വാദം വനംവകുപ്പും സമ്മതിക്കുന്നു. വനത്തിൽ പോകുന്നവർ അലക്ഷ്യമായി സിഗരറ്റ്, ബീഡി കുറ്റികൾ വലിച്ചെറിയുമ്പോഴോ, ഭക്ഷണമുണ്ടാക്കാൻ തീ കുട്ടുമ്പോഴോ, ക്യാംപ് ഫയറിലെ തീപ്പൊരികളോ ആണു വലിയ കാട്ടുതീയ്ക്കു കാരണമാകുന്നത്. ഒന്നു ശ്രദ്ധിച്ചാൽ ഇവ ഒഴിവാക്കാം. വിദേശത്തെപോലെ സൂര്യതാപം കൊണ്ടോ മിന്നൽപ്പിണർ കൊണ്ടോ മരങ്ങൾ കൂട്ടിയുരസിയോ കേരളത്തിൽ തീ ഉണ്ടാകുന്നില്ല. വനംവകുപ്പ് ഉദ്യോഗസ്ഥരോടോ മറ്റോ പക തീർക്കാനായും രസത്തിനായും മനഃപൂർവം തീയിടുന്നവരുമുണ്ട്. സ്വന്തം സ്ഥലസംരക്ഷണത്തിനും തടി മോഷണത്തിന്റെ തെളിവു നശിപ്പിക്കാനും തീയിടുന്ന സംഭവങ്ങളുമുണ്ടെന്നു വനംവകുപ്പ് പറയുന്നു.

എരിഞ്ഞമർന്ന ചിത പോലെയാണു കത്തിയെരിഞ്ഞ കാട്. ആയിരക്കണക്കിനു ജീവികൾക്കു ജീവനേകിയ കാട് വെണ്ണീറായി കിടക്കുന്ന നെഞ്ചുപൊട്ടുന്ന കാഴ്ച. ചത്തുമലച്ച മൃഗങ്ങളുടെ കത്തിക്കരിഞ്ഞ മാംസത്തിന്റെ ഗന്ധം, പുകയുന്ന മരക്കുറ്റികൾ, കനൽ കെടാത്ത ചില്ലകൾ, നിശബ്ദതയുടെ മഹാപ്രവാഹം, പേടിപ്പെടുത്തുന്ന ഇളംകാറ്റ്. വലിയൊരു ചുടലപ്പറമ്പ് പോലെ കിടക്കുന്ന കൊടുങ്കാട് ഏതൊരു പ്രകൃതിസ്നേഹിയെയും ഞെട്ടിക്കും, ഉള്ളുലയ്ക്കും. കാട് കത്തിയാൽ കുറെ മൃഗങ്ങളും മരങ്ങളും നശിക്കുമെന്നല്ലാതെ ദൂരെ നാട്ടിൽ കിടക്കുന്ന നമുക്കെന്താണു സംഭവിക്കുക? അറിയുക, ഓരോ തീപ്പൊരിയും ഓരോ പ്രളയത്തെ ഉള്ളിലൊളിപ്പിച്ചിട്ടുണ്ട്. അതേപ്പറ്റി അടുത്തദിവസം തുടരും. 

Content Highlights: Wildfire, Forest Fire in Kerala, Wildfire Disaster, Forest Fire Disaster Management

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.