എറണാകുളം ജില്ലയിൽ ഇന്നു ലഭിച്ച 6 പരിശോധനാ ഫലങ്ങളും നെഗറ്റീവ്

കൊച്ചി ∙ എറണാകുളം ജില്ലയിൽ ഇന്നു ലഭിച്ച 6 പരിശോധനാ ഫലങ്ങളും നെഗറ്റീവ്. ഇന്നലെ രാത്രിയും ഇന്നു രാവിലെയുമായി 22 സാംപിളുകൾ കൂടി പരിശോധനയ്ക്ക് അയച്ചിട്ടുണ്ട്. കഴിഞ്ഞ ദിവസങ്ങളെ അപേക്ഷിച്ച് കൺട്രോൾ റൂമിലേക്കുള്ള ഫോൺ വിളികളുടെ എണ്ണത്തിൽ കുറവുണ്ടായിട്ടുണ്ട്. ഇന്നലെ രാത്രി മുതൽ ഇന്ന് രാവിലെ 9 മണി വരെ 111 ഫോൺ വിളികളാണ് എത്തിയത്.

രാത്രിയെത്തിയ ഭൂരിഭാഗം വിളികളും അതിഥി തൊഴിലാളികളിൽനിന്നാണ്. ഭക്ഷണം സംബന്ധിച്ച വിവരങ്ങൾക്കായാണ് കൂടുതൽ വിളികളും. ഇവർക്കെല്ലാം അതത് പ്രദേശത്തെ കമ്മ്യൂണിറ്റി കിച്ചണുകളുമായി ബന്ധപ്പെടുന്നതിനുള്ള ഫോൺ നമ്പരുകൾ നൽകി. 25ന് കോവിഡ് സ്ഥിരീകരിച്ച 37 വയസ്സുകാരൻ സന്ദർശനം നടത്തിയ ബാങ്കിൽ പോയിട്ടുണ്ട് നിരീക്ഷണത്തിൽ കഴിയാണോ എന്ന് ചോദിച്ചും വിളികളെത്തി. ഇന്നലെ കൊച്ചി തുറമുഖത്തെത്തിയ 4 കപ്പലുകളിലെ 102 ക്രൂ അംഗങ്ങളെ പരിശോധിച്ചതിൽ ആർക്കും തന്നെ രോഗലക്ഷണങ്ങൾ കണ്ടെത്തിയില്ല.

English Summary: COVID-19: 6 samples test negative in Ernakulam