‘വരുമാനത്തിനു മദ്യക്കടകള്‍ തുറക്കേണ്ട; വ്യാജവാറ്റ് പെരുകുന്നതിലാണ് ആശങ്ക’

തിരുവനന്തപുരം ∙ മദ്യക്കടകള്‍ സംസ്ഥാനത്തിന്റെ വരുമാനത്തിനായി തുറക്കേണ്ടന്ന് ധനമന്ത്രി ഡോ. തോമസ് ഐസക്. വ്യാജവാറ്റ് പെരുകുന്നതിലാണ് തന്റെ ആശങ്കയെന്നും ഐസക് പറഞ്ഞു. അതേസമയം, മദ്യം വാങ്ങാനുള്ള ടോക്കൺ നൽകുന്ന മൊബൈൽ ആപ്പായ ബവ്ക്യൂവില്‍ അനിശ്ചിതത്വം തുടരുന്നു. ആപ് അപ്‍ലോഡ് ചെയ്യുന്നതായുള്ള സൂചന ഫെയര്‍കോഡ് കമ്പനി ഫെയ്സ്ബുക്കിലൂടെ നല്‍കിയിരുന്നു.

അതേക്കുറിച്ച് ഒന്നും അറിയില്ലെന്ന നിലപാടിലാണു ബെവ്കോ. ആപ്പിനെക്കുറിച്ചുള്ള ചോദ്യത്തിനു എക്സൈസ് മന്ത്രി ടി.പി.രാമകൃഷ്ണനും വ്യക്തമായ മറുപടിയില്ല. ഗൂഗിളിന്റെ അനുമതിക്കായി കാത്തിരിക്കുന്നുവെന്ന് മന്ത്രി കോഴിക്കോട് പറഞ്ഞു. ആപ് വൈകുന്നത് സര്‍ക്കാരിന് വരുമാന നഷ്ടമുണ്ടാക്കില്ലേ എന്ന ചോദ്യത്തിന് ഉത്തരം റിപ്പോര്‍ട്ടറോടു വ്യക്തിപരമായി പറയാമെന്നായിരുന്നു രാമകൃഷ്ണന്‍റെ മറുപടി.

English Summary: Thomas Isaac about Kerala liquor sale