കേരളത്തിൽ വികസനം കൊണ്ടുവന്നുവെന്ന് അവകാശപ്പെടുന്ന കിഫ്ബിയുടേത് ഊതിപ്പെരുപ്പിച്ച വികസനമാണെന്ന് പ്രതിപക്ഷ നേതാവ് രമേശ് ചെന്നിത്തല. നിയമസഭയോടും മന്ത്രിസഭയോടും ഉത്തരവാദിത്തമോ ബാധ്യതയോ ഇല്ലാത്ത സ്ഥാപനമായ കിഫ്ബി വലിയ തട്ടിപ്പാണ്. ജനാധിപത്യ സംവിധാനത്തില്‍ നിയമസഭ വോട്ട് ചെയ്തു പാസ്സാക്കുന്ന ഓരോ പൈസയുമാണു സർക്കാർ ചെലവഴിക്കേണ്ടത്. എന്നാല്‍ നിയമസഭയ്ക്കും ഭരണത്തിനും ധനകാര്യ വ്യവസ്ഥിതിക്കും പുറത്തു ധനസമാഹരണവും ചെലവിടലുമാണു കിഫ്ബിയില്‍. സ്വതന്ത്ര സാമ്രാജ്യത്തെപ്പോലെയാണു കിഫ്ബിയുടെ പ്രവര്‍ത്തനം. കിഫ്ബിയുടെ പ്രവര്‍ത്തനത്തില്‍ നിറഞ്ഞു നില്‍ക്കുന്നതു നിഗൂഢതയാണ്. ഇത് കേരളത്തെ കടക്കെണിയിലാക്കുമെന്നും അദ്ദേഹം ‘മനോരമ ഓൺലൈനിന്’ അനുവദിച്ച അഭിമുഖത്തിൽ ആരോപിച്ചു.
