അനിൽകുമാറിന് സിപിഎം അന്തര്‍ധാര നേരത്തേ ഉണ്ടാകാം: സിദ്ദിഖ്; വ്യക്തിതാല്‍പര്യമെന്ന് ഷാഫി

കോഴിക്കോട് ∙ സിപിഎമ്മിൽ ചേർന്ന കെ.പി.അനില്‍കുമാറിനെ വിമര്‍ശിച്ച് കെപിസിസി വര്‍ക്കിങ് പ്രസിഡന്‍റ് ടി.സിദ്ദിഖും ഷാഫി പറമ്പിൽ എംഎൽഎയും. കോണ്‍ഗ്രസ് പ്രവര്‍ത്തകരെ കൊല ചെയ്യുന്ന പാര്‍ട്ടിയിലേക്ക് പോയത് മുന്‍പുണ്ടായിരുന്ന അന്തര്‍ധാര മൂലമാണെന്നു സിദ്ദിഖ് ആരോപിച്ചു. സിപിഎമ്മുമായി നേരത്തേ അഡ്ജസ്റ്റ്മെന്റ് ഉണ്ടായിരുന്നിരിക്കാമെന്നും സിദ്ദിഖ് പറഞ്ഞു.

പാര്‍ട്ടിക്ക് വിജയമുണ്ടാകുമ്പോള്‍ കൂടെ നില്‍ക്കുകയും പരാജയം സംഭവിക്കുമ്പോള്‍‍ കുറ്റം പറഞ്ഞു വിട്ടുപോകുകയും ചെയ്യുന്നത് ഉത്തമ കോണ്‍ഗ്രസിന് ചേര്‍ന്നതല്ലെന്ന് ഷാഫി പറമ്പില്‍ പ്രതികരിച്ചു. അര്‍ഹമായ പദവികളെല്ലാം നേടിയിട്ടും അനില്‍കുമാര്‍ സിപിഎമ്മില്‍ ചേര്‍ന്നതു തീര്‍ത്തും വ്യക്തിതാല്‍പര്യം കൊണ്ടു മാത്രമാണ്. പ്രതിസന്ധി ഘട്ടത്തില്‍ പാര്‍ട്ടിക്കൊപ്പം ഉറച്ചുനില്‍ക്കുന്നവനാണ് യഥാര്‍ഥ കോണ്‍ഗ്രസുകാരനെന്നും ഷാഫി പാലക്കാട് പറ‍ഞ്ഞു.

English Summary: Congress leaders raise allegations against KP Anilkumar