‘അവിടെത്തന്നെ നിന്നോളൂ, എസ്പി 80% സീറ്റ് നേടും’; യോഗിയെ പരിഹസിച്ച് അഖിലേഷ് യാദവ്

ലക്നൗ∙ ഉത്തർപ്രദേശിൽ ബിജെപി സ്ഥാനാർഥികളെ പ്രഖ്യാപിച്ചതിനു പിന്നാലെ യുപി മുഖ്യമന്ത്രി  യോഗി ആദിത്യനാഥിനെ പരിഹസിച്ച് സമാജ്‌വാദി പാർട്ടി നേതാവ് അഖിലേഷ് യാദവ്. യോഗി ഗൊരഖ്പുരിൽ മത്സരിക്കുമെന്ന് പാർട്ടി വെളിപ്പെടുത്തിയതിനു പിന്നാലെയാണ് അഖിലേഷിന്റെ പരിഹാസം. ഗൊരഖ്പുരിൽ തന്നെ നിന്നാൽമതിയെന്നും തിരിച്ചുവരരുതെന്നുമാണ് അദ്ദേഹം പറഞ്ഞത്.

‘യോഗി അയോധ്യയിൽ നിന്നു മത്സരിക്കുമെന്നാണ് ആദ്യം ബിജെപി പറഞ്ഞത്. പിന്നെയത് മധുരയും പ്രയാഗ്‌രാജുമായി. ഇപ്പോൾ നോക്കൂ...എനിക്കത് ഇഷ്ടപ്പെട്ടു. യോഗി അവിടെതന്നെ നിന്നാൽമതി, അവിടെനിന്നു മറ്റെവിടേയ്ക്കെങ്കിലും വരുന്നതുകൊണ്ട് ഒരു പ്രയോജനവുമില്ല.’– അഖിലേഷ് പരിഹസിച്ചു. ബിജെപിക്ക് 20 ശതമാനം സീറ്റുകൾ മാത്രമേ ലഭിക്കൂവെന്നും, ശേഷിക്കുന്ന 80 ശതമാനം സീറ്റുകൾ എസ്പി നേടുമെന്നും അഖിലേഷ് പറഞ്ഞു.

ഉത്തർപ്രദേശിൽ ബിജെപിക്കെതിരെ അഖിലേഷും സംഘവും കച്ചകെട്ടിയിറങ്ങിയിരിക്കുകയാണ്. കഴിഞ്ഞ ദിവസങ്ങളിൽ അഞ്ച് എംഎൽഎമാരാണ് ബിജെപി വിട്ട് സമാജ്‌വാദി പാർട്ടിയിൽ ചേർന്നത്. സ്വാമി പ്രസാദ് മൗര്യ, ദരംസിങ് സയ്നി എന്നീ മന്ത്രിമാരും രാജിവച്ചവരിൽ ഉൾപ്പെടുന്നു.

ഫെബ്രുവരി 10 മുതല്‍ ഏഴ് ഘട്ടങ്ങളായാണ് യുപിയില്‍ തിരഞ്ഞെടുപ്പ് നടക്കുന്നത്. മാര്‍ച്ച് 10-നാണ് വോട്ടെണ്ണല്‍. 

English Summary: "Stay There, Don't Come Back": Akhilesh Yadav's Swipe At Yogi Adityanath