അങ്കമാലിയിൽ പകല്‍ ഇട്ട കെ റെയിൽ സര്‍വേ കല്ലുകള്‍ രാത്രി പിഴതുമാറ്റി റീത്ത് വച്ചു

കൊച്ചി∙ അങ്കമാലിയിൽ കെ റെയിലിനായി സ്ഥാപിച്ച സർവേ കല്ലുകൾ പിഴുതു റീത്തു സ്ഥാപിച്ചു പ്രതിഷേധം. പുളിയനത്തു പാടശേഖരത്തിൽ സ്ഥാപിച്ചിരുന്ന ആറു കല്ലുകളാണ് രാത്രി പിഴുതെടുത്ത് ജംങ്ഷനിലെ ബസ് കാത്തിരിപ്പു കേന്ദ്രത്തിനു സമീപം വച്ചിരിക്കുന്നത്. എളവൂർ സെന്റ് ആന്റണീസ് പള്ളിക്കു സമീപവും കല്ലിളക്കി റീത്തു വച്ചിട്ടുണ്ട്. ഇന്നലെ ജനങ്ങളുടെ കടുത്ത പ്രതിഷേധത്തിനിടെയാണ് ഈ ഭാഗത്ത് പൊലീസ് സഹായത്തോടെ ഉദ്യോഗസ്ഥർ സർവേ കല്ലുകൾ സ്ഥാപിച്ചത്.

ജനകീയ സമരസമിതിയുടെ നേതൃത്വത്തിൽ ഒരാഴ്ചയായി കെ റെയിലിനെതിരെ പ്രതിഷേധ സമരങ്ങൾ പുരോഗമിക്കുകയാണ്. ഇന്നും ജനകീയ സമരസമിതി ഇവിടെ സമരം നടത്തുന്നുണ്ട്. ഇതിന്റെ ഭാഗമായി കല്ലുകൾ പിഴുതു മാറ്റുമെന്നു പ്രഖ്യാപിച്ചിരുന്നു. ഇതിനിടെയാണ് ഇന്നലെ രാത്രിയോടെ സർവേ കല്ലുകൾ പിഴുതെടുത്തിരിക്കുന്നത്. ആരാണ് ഇതിനു പിന്നിലെന്നു വ്യക്തമല്ല. 

ഇന്നലെ ഉദ്യോഗസ്ഥർ കല്ലു സ്ഥാപിക്കാൻ എത്തുമ്പോൾ പ്രതിഷേധക്കാരുടെ എണ്ണം കുറവായിരുന്നു. വൻ പൊലീസ് സംഘം പ്രതിഷേധക്കാരെ തടഞ്ഞാണ് ഇന്നലെ കല്ലിട്ടത്.

English Summary: Angamali Silver line/K Rail survey stones removed and placed wreath