ധർമ്മടത്ത് വീണ്ടും കല്ലിടാൻ നീക്കം, പ്രതിഷേധം; സ്ഥലത്ത് വൻപൊലീസ് സന്നാഹം

കണ്ണൂർ∙ സില്‍വര്‍ലൈന്‍ സര്‍വേയ്ക്കെതിരെ ധര്‍മടത്ത് വീണ്ടും പ്രതിഷേധം. രാവിലെ പ്രതിഷേധത്തെ തുടര്‍ന്ന് പിന്‍വാങ്ങിയ ഉദ്യോഗസ്ഥര്‍ വീണ്ടും എത്തിയതോടെയാണ് സംഘര്‍ഷമുണ്ടായത്. കല്ലിടാനെത്തിയ ഉദ്യോഗസ്ഥർക്കു വലയം തീർത്ത് വൻ പൊലീസ് സംഘവും കൂടെയുണ്ട്. വീണ്ടും കുഴിയെടുക്കാൻ ശ്രമിച്ചതോടെ സ്ത്രീകളടക്കമുള്ളവർ പ്രതിഷേധിച്ചു. 

രാവിലെ പ്രതിഷേധക്കാർ കെ റെയില്‍ എന്‍ജിനീയര്‍ അരുണിനെ കയ്യേറ്റം ചെയ്തിരുന്നു. എന്നാൽ ജീവനക്കാര്‍ കയ്യേറ്റം ചെയ്തതായി പ്രതിഷേധക്കാരും ആരോപിച്ചു. മുഴുപ്പിലങ്ങാടിയിൽ കല്ലിടലിനെതിരെ പ്രതിഷേധിച്ച നാട്ടുകാരെ അറസ്റ്റുചെയ്തു നീക്കാന്‍ പൊലീസ് ശ്രമിച്ചത് സംഘർഷാവസ്ഥയിലേക്ക് നയിച്ചു. നാട്ടുകാരും കോണ്‍ഗ്രസ് പ്രവര്‍ത്തകരും മുദ്രാവാക്യം വിളിച്ച് പ്രതിഷേധിച്ചു. കല്ല് പിഴുതെറിയാൻ ശ്രമിച്ചവരെ പൊലീസ് തടഞ്ഞു.

English Summary: Protest against Silver Line at Kannur Dharmadam