തൃക്കാക്കര സ്ഥാനാർഥി പ്രഖ്യാപനം: സഭയെ വലിച്ചിഴച്ചത് മന്ത്രി രാജീവെന്ന് വി.ഡി. സതീശൻ

കൊച്ചി∙ തൃക്കാക്കര ഉപതിരഞ്ഞെടുപ്പിനായുള്ള ഇടതുമുന്നണി സ്ഥാനാർഥി പ്രഖ്യാപനത്തിലേക്ക് സഭയെ വലിച്ചിഴച്ചത് മന്ത്രി പി.രാജീവാണെന്ന് പ്രതിപക്ഷ നേതാവ് വി.ഡി. സതീശൻ. ഇടതുമുന്നണി സ്ഥാനാർഥി ഡോ. ജോ ജോസഫിനെ സഭയുടെ സ്ഥാനാർഥിയെന്ന് വരുത്തി തീർക്കാൻ ശ്രമം നടന്നതായും സതീശൻ ആരോപിച്ചു. സഭയുടെ നോമിനിയാണോ എന്ന് സ്ഥാനാർഥിയോട് ആദ്യം ചോദിച്ചത് മാധ്യമങ്ങളാണ്. ഇതിലെ തർക്കം കോൺഗ്രസിന്റെ തലയിൽ കെട്ടിവയ്ക്കാൻ നോക്കേണ്ട‌െന്നും അദ്ദേഹം പറഞ്ഞു.

ഇടതു സ്ഥാനാർഥി ഡോ. ജോ ജോസഫിനെതിരെ യുഡിഎഫ് തെറ്റായ പ്രചാരണം നടത്തിയെന്ന് മന്ത്രി പി.രാജീവ് ആരോപിച്ചിരുന്നു. സഭയെ ഇതിലേക്ക് വലിച്ചിഴച്ചുവെന്നും എൽഡിഎഫിന്റെ ചെലവില്‍ സഭാ നേതൃത്വത്തെ അപഹസിക്കാനാണ് പ്രതിപക്ഷത്തിന്റെ ശ്രമമെന്നും അദ്ദേഹം തുറന്നടിച്ചിരുന്നു. ഇതിനോടാണ് വി.ഡി.സതീശന്റെ പ്രതികരണം.

English Summary: VD Satheesan on Thrikkakara LDF candidate selection controversy