‘സിൽവർ ലൈൻ കുറ്റിയടി നിർത്തിയത് തിരഞ്ഞെടുപ്പ് പേടി കൊണ്ട്’; പത്രിക സമർപ്പിച്ച് ബിജെപി
Mail This Article
കൊച്ചി∙ തൃക്കാക്കര ഉപതിരഞ്ഞെടുപ്പിൽ എൻഡിഎ സ്ഥാനാർത്ഥി എ.എൻ. രാധാകൃഷ്ണൻ നാമനിർദേശ പത്രിക സമർപ്പിച്ചു. കാക്കനാട് ഗാന്ധി പ്രതിമയിൽ പുഷ്പാർച്ചന നടത്തിയതിന് ശേഷം സംസ്ഥാന അധ്യക്ഷൻ കെ.സുരേന്ദ്രനും പ്രവർത്തകർക്കും ഒപ്പം പ്രകടനമായാണ് കലക്ട്രേറ്റിൽ എത്തിയത്. തൃക്കാക്കര നിയോജകമണ്ഡലം വരണാധികാരി വിധു എ.മേനോനാണ് പത്രിക സമർപ്പിച്ചത്.
എൽഡിഎഫും യുഡിഎഫും മതഭീകര ശക്തികളെ വോട്ടു ബാങ്കായി ഉപയോഗിച്ച് ക്രൈസ്തവ സമൂഹത്തെ വേട്ടയാടുകയാണെന്ന് പത്രികസമർപ്പണത്തിന് ശേഷം കെ.സുരേന്ദ്രൻ പറഞ്ഞു. സിൽവർ ലൈൻ കുറ്റിയടി നിർത്തിവച്ചത് സർക്കാരിന്റെ തിരഞ്ഞെടുപ്പ് പേടി കൊണ്ടാണ്. ഇന്ധന വിലയിൽ കേരള സർക്കാർ ജനങ്ങൾക്ക് ഒരു ഇളവും നൽകുന്നില്ല. മറ്റു സംസ്ഥാനങ്ങളേക്കാൾ അധികമാണ് കേരളത്തിലെ വില.
എഎപി പിൻമാറിയതോടെ എൽഡിഎഫ്- യുഡിഎഫ് വിരുദ്ധ വോട്ടുകൾ എൻഡിഎയ്ക്ക് ലഭിക്കുമെന്ന് ഉറപ്പായതായും കെ.സുരേന്ദ്രൻ പറഞ്ഞു. കുമ്മനം രാജശേഖരൻ, പി.കെ.കൃഷ്ണദാസ്, ജോർജ് കുര്യൻ, എസ്. സുരേഷ്, എസ്. ജയകൃഷ്ണൻ തുടങ്ങിയവർ ഒപ്പമുണ്ടായിരുന്നു.
English Summary: Thrikkakara bypoll; AN Radhakrishnan file nomination