വിഴിഞ്ഞത്ത് ബൈക്ക് റേസിനിടെ വാഹനങ്ങൾ കൂട്ടിയിടിച്ചു; 2 യുവാക്കൾക്ക് ദാരുണാന്ത്യം
Mail This Article
തിരുവനന്തപുരം ∙ വിഴിഞ്ഞം മുക്കോലയിൽ ബൈക്ക് റേസിനിടെയുണ്ടായ അപകടത്തിൽ രണ്ടുപേർ മരിച്ചു. ചൊവ്വര സ്വദേശി ശരത്, വട്ടിയൂർക്കാവ് സ്വദേശി മുഹമ്മദ് ഫിറോസ് എന്നിവരാണ് മരിച്ചത്. ബൈക്ക് റേസ് പതിവായി നടക്കുന്ന സ്ഥലമാണ് വിഴിഞ്ഞം മുക്കോല പ്രദേശം. റേസിനിടെ മത്സരിച്ച് മുന്നോട്ടുകുതിച്ച ബൈക്കുകൾ പരസ്പരം കൂട്ടിയിടിക്കുകയായിരുന്നുവെന്ന് സംശയിക്കുന്നതായി പൊലീസ് പറഞ്ഞു.
ഞായറാഴ്ച വൈകിട്ട് അഞ്ചരയോടെയായിരുന്നു അപകടം. കൂട്ടിയിടിയില് ബൈക്കുകളുടെ മുന്വശം പൂര്ണമായി തകര്ന്ന നിലയിലാണ്. ഗുരുതരമായി പരുക്കേറ്റ രണ്ട് യുവാക്കളെയും പൊലീസും നാട്ടുകാരും ചേര്ന്ന് ആശുപത്രിയിലേക്ക് കൊണ്ടുപോയെങ്കിലും അവിടെ എത്തുന്നതിന് മുൻപ് മരണം സംഭവിക്കുകയായിരുന്നു.
മുക്കോല ബൈപാസിലെ റേസിങ് നിയന്ത്രിക്കുന്നതിന്റെ ഭാഗമായി ഞായറാഴ്ച രാവിലെ പൊലീസ് നടത്തിയ പരിശോധനയില് നാല് ബൈക്കുകള് പിടിച്ചെടുത്തിരുന്നു. സംഭവത്തിന്റെ പശ്ചാത്തലത്തിൽ, അപകടകരമായ ബൈക്കോട്ടം നിയന്ത്രിക്കുന്നതിനാവശ്യമായ നടപടി സ്വീകരിക്കുമെന്ന് പൊലീസ് അറിയിച്ചു.
English Summary: Two died in bike race accident in Vizhinjam