‘ആട്ടം പാട്ട്’: പുരസ്‌കാരങ്ങൾ വിതരണം ചെയ്തു; അതിഥികളായി സത്യൻ അന്തിക്കാടും അനശ്വര രാജനും

കൊച്ചി∙ ‌മലയാള മനോരമ ജെയിൻ യൂണിവേഴ്സിറ്റിയുമായി ചേർന്നു സ്കൂൾ വിദ്യാർഥികൾക്കായി സംഘടിപ്പിച്ച ‘ആട്ടം പാട്ട്’ ഓൺലൈൻ കലോത്സവ വിജയികൾക്കുള്ള സമ്മാനങ്ങൾ വിതരണം ചെയ്തു. കൊച്ചിയിൽ സംഘടിപ്പിച്ച ചടങ്ങിൽ മുഖ്യ അതിഥികളായി സംവിധായകൻ സത്യൻ അന്തിക്കാടും യുവതാരം അനശ്വര രാജനും പങ്കെടുത്തു. മനസ്സിന്റെ മാലിന്യങ്ങളകറ്റി ശുദ്ധീകരിക്കാനുള്ള മാർഗമാണു കലയെന്നു സംവിധായകൻ സത്യൻ അന്തിക്കാട് പറഞ്ഞു. യുവജനോത്സവ വേദികളിൽ നിന്നാർജിച്ച ആത്മവിശ്വാസമാണു തന്റെ ജീവിതത്തിൽ ഒട്ടേറെ വേദികളിലേക്കുള്ള കരുത്തു പകർന്നതെന്ന് നടി അനശ്വര പറഞ്ഞു.

ആട്ടം പാട്ടിലെ സംസ്ഥാനതല വിജയികളായ എറണാകുളം കാക്കനാട് ഭവൻസ് ആദർശ വിദ്യാലയത്തിനുള്ള 25,000 രൂപയുടെ കാഷ് അവാർഡും ട്രോഫിയും സർട്ടിഫിക്കറ്റും റണ്ണേഴ്സ് അപ്പായ പന്തളം എൻഎസ്എസ് ഇംഗ്ലിഷ് മീഡിയം യുപി സ്കൂളിനുള്ള 15,000 രൂപയുടെ കാഷ് അവാർഡും ട്രോഫിയും സർട്ടിഫിക്കറ്റും ഇരു സ്കൂളുകളിലെയും അധ്യാപകരും വിദ്യാർഥികളും ചേർന്നു സത്യൻ അന്തിക്കാടിൽനിന്ന് ഏറ്റുവാങ്ങി. 

ജൂനിയർ വിഭാഗം കലാതിലകമായ കണ്ണൂർ ചെറുപുഴ ജെഎം യുപി സ്കൂൾ വിദ്യാർഥി കെ.ആർ.അഞ്ജന, കലാപ്രതിഭയായ കാക്കനാട് ഇടച്ചിറ മാർത്തോമാ പബ്ലിക് സ്കൂൾ വിദ്യാർഥി കെ.എസ്.കാശിനാഥൻ, സീനിയർ വിഭാഗം കലാതിലകമായ കോട്ടയം ഗിരിദീപം ബഥനി സെൻട്രൽ സ്കൂൾ വിദ്യാർഥി അങ്കിത അനീഷ്, സീനിയർ വിഭാഗം കലാപ്രതിഭാ പട്ടം പങ്കിട്ട കാക്കനാട് ഭവൻസ് ആദർശ വിദ്യാലയയിലെ എസ്.ജെ.വിശാൽ, എറണാകുളം കൊങ്ങോർപ്പിള്ളി ഗവ. എച്ച്എസ്എസിലെ സി.എസ്.ആനന്ദ് എന്നിവർക്കുള്ള സമ്മാനങ്ങൾ അനശ്വര രാജൻ വിതരണം ചെയ്തു. 10,000 രൂപയും ട്രോഫിയും സർട്ടിഫിക്കറ്റുമാണ് ഇവർക്കു സമ്മാനിച്ചത്. 

സീനിയർ വിഭാഗം കലാപ്രതിഭാ പട്ടം പങ്കിട്ട മലപ്പുറം തിരൂർക്കാട് എഎം എച്ച്എസ്എസ് മുൻ വിദ്യാർഥി ഷെർവിൻ ഷറഫ് തുടർപഠനത്തിനായി വിദേശത്തായതിനാൽ ചടങ്ങിനെത്തിയില്ലെങ്കിലും സദസ് കയ്യടികളോടെ അഭിനന്ദനം അറിയിച്ചു. ആട്ടം പാട്ട് കലോത്സവത്തിന്റെ അനുഭവങ്ങളും വിജയികൾ സദസ്സിനോടു പങ്കുവച്ചു.

ജെയിൻ യൂണിവേഴ്സിറ്റി ന്യൂ ഇൻഷ്യേറ്റീവ്സ് ഡയറക്ടർ ടോം ജോസഫ്, കാക്കനാട് ഭവൻസ് ആദർശ വിദ്യാലയ വൈസ് പ്രിൻസിപ്പൽ പി.ജ്യോതി, പന്തളം എൻഎസ്എസ് സ്കൂൾ പ്രിൻസിപ്പൽ വി.രാകേഷ് കുമാർ, മലയാള മനോരമ മാർക്കറ്റിങ് ജനറൽ മാനേജർ ബി.ബാലഗോപാൽ എന്നിവർ പ്രസംഗിച്ചു. 

English Summary: Attam Pattu Online School Kalolsavam prizes distributed